Grabe manguwarta

Gikan sa cellphone number  -0905-7630580: “Good day. Kining traffic enforcer nga si MB (inisyal) sa Carcar City, ba. Grabe kaayo manguwarta. Diha dapit sa Gaisano Carcar bisag no stopping puwede ka katamak basta mohatag ka og P20. Siya pay manawag og pasahero.” -- (10:19:41-- August 10, 2007)

Nindot og raket ning maong traffic enforcer kay gawas sa iyang pagka enforcer, dispatcher o barker pa gyud. Ang nakaparat kay kun tinuod ang alegasyon sa atong texter, siya pay nangunay paglapas sa balaod nga angay unta niyang ipatuman. Tiaw ba nga bisan no stopping puyde man nga makahunong ug mo-pick-up og pasahero basta mohatag lang ang driver og P20 ngadto sa maong enforcer.

Hinuon, dili pa nato siya angay kondenahon kay kining sumbong nga atong nadawat subject pa man sa confirmation. Pero kun tinuod man ugaling kini, tulibagbag gyud kaayong pamation. Kinahanglang mabadlong ang iyang tinonto. Labing maayo nga masubay sa labaw’ng opisyal sa maong traffic enforcer kun unsa ka tinuod ang pasangil sa atong texter aron masuta kun tinuod ba kini o dili.

* * *

Sa laing bahin: “Good day.  Kining akong reklamo bahin sa usa ka stonecraft diri sa may Casili, Mandaue City. Grabe kaayo ilang abog, adto gyud mopaingon sa among balay. Ang among mga bata mag-antos. Gipangsip-on ug gipang-ubo sa kaabog sa stonecraft. Amo na man na silang gibadlong sa una. Nawala ra to pero karon nibalik na sad.” -- 0920-4089269 (10:02:47--August 11, 2007)

Lehitimo kining imong reklamo. Naglambigit man god kini sa panglawas, dili lang ninyo kundili sa inyong mga bata. Labing maayo tingali nga i-refer mo una kining problemaha ngadto sa mga opisyal sa barangay. Kun dili sila moaksiyon, idangop kini ngadto sa higher authorities aron seguradong ma-address kining maong problema. Dili maayong pasagdan lang kini kay peligro kini sa panglawas. Tiaw bay kada adlaw kamo makahingos og abog. Mameligro ang inyong baga nianang kalakiha. Busa kinahanglang mapangitaan kinig alternatibong solusyon.

* * *

 (Sumbong ug reklamo? Text sa 0910-8105522)