Mamalong sa suga!
Gikan sa cellphone number -0905-7715908: “Good day, Sir. Kana bang mga polis sa usa ka station sa Mandaue mamalong sa suga inigkagabii. Mag-inom sila. Ilang sugoon pagpalit og Tanduay ang ilang asset nga ginganlan og Jfox. Kun naa tay reklamo mahadlok na ta mosulod kay ang mga polis nag-duty hubog na man.” --(
Morag maglisod ko sa pagtuo niining maong sumbong pero wala man usab koy nakita nga anggulo nga magtumo-tumo lang ang atong texter. Kay unsa bay iyang makuha kun maghimohimo siyag estorya nga dili tinuod? Mao nga alang nako, angayan kining susihon kun unsa kini ka tinuod. Kun tinuod man ugaling kini, tulibagbag gayod kaayong pamation! Mao nga hinaot pa unta nga dili kini tinuod.
Atong sangpiton ang atensiyon sa hepe sa kapolisan sa Opao station 5. Palihog subaya kun kinsa sa imong mga sakop ang manggi-inom panahon sa ilang pag-duty. Nasayod kong dili ka maglisod sa paghimo niini sanglit nakahibalo ka man kun kinsa ang mga polis nga imong gipa-duty panahon sa kagabhion. Hangyo lang kining amo, Tsip, nga dili mandatory. Pamarayeg lang, ba! Lehitimo baya ang reklamo sa akong texter.
* * *
Sa laing bahin: “Good day, Sir. Duna koy reklamo bahin niining magsige og kawat sa mga load. Mag-text nga kuno duna silay promo apan automatic nga maibanan ang atong load. Mao kini ang mga tigpadala og message nga promo: 8070 ug 386. Dili ba kaha kini dakong sindikato? Tiaw mo ba nga kadaghan sa mabiktima niini. I hope nga masulbad na kini.” -- 0918-5201614 (
Masulbad lang kining maong estilo sa binuang kun ang mga network provider mismo maoy mohunong sa pagpadala niining unsolicited text promo nga awtomatikong moiban sa atong load. Sila man ang nagpasiugda niini busa sila lang ang makahimo sa paghunong niini. Maluoy unta sila sa ilang mga subscribers nga gustong magdaginot sa load.
Dili man tingali matawag nga dako kining sindikato apan angay kining tawgon nga dakong tinonto. Wala ra ba gyud dag-anan ang mga subscriber. Ambot, kanunay tingaling nag-monitor ang taga network provider kun kinsa ang subscribers nga nag-load mao nga ila dayon kining padad-an og text promo aron maibanan ang load niini. Binuang!
(Sumbong ug reklamo? Text sa 0910-8105522)
- Latest
- Trending
