Daku kining hagit sa kadagkoan sa kapolisan nga gitugyanan pagsuperbisar sa mga security guard agencies aron sutaon kun ang maong mga ahensya migamit ba og maayong kalidad sa armas.
Daghan ko og mga kaila nga gwardya, gipatan-aw ko nila sa armas nga giisyu kanila sa ilang ahensya, ug pwerteng batia.
Sultihan ko kamo nga sa kadugay nako nga nahimong police reporter, maayo na kaayo kong motan-aw og armas.
Apan labaw sa tanan, sa kadugay na nako nga nahimong police reporter gikan sa 1989 hangtud sa 2001, nahibaw-an nako ang mga binuang sa pipila ka ahensya sa mga gwardya.
Labing siguro, wala usab kini malilong ngadto sa kadagkoan sa kapolisan. Ang pangutana kun nganong ang maong mga binuang wala masumpo, “ No Comment ”ko. He! He! He!
* * *
Usa ka higala nako nga supervisor og security agency mitug-an nga ang ilang ahensya migamit og pamaagi nga bisan gamay ra ang ilang armas nga gipadala sa ilang “main agency” ila gihapon nga mahatagan og armas ang ilang mga sakop dinhi sa Sugbu.
Unsaon? Ang ilang branch manager mikuha og kopya sa listahan sa mga lisensyadong armas sa ilang “main agency.” Nangayo usab sila og kopya sa mga firearms license.
Dayon, ang abtik nga branch manager nagpabuhat og armas gikan sa mga “illegal gun makers” sa Danao nga gikopya g’yod ang modelo sa lisensyadong armas, unya gibutangan usab og serial numbers nga kopya g’yod gikan sa lisensya.
Resulta, wala sila’y kulba nga mogamit niini kay kun dunay inspection, may mapakita man sila nga lisensya sa armas, apan dili para sa maong armas nga giisyu sa gwardya.
Ang pag-ila kun ang maong armas mao ba g’yod ang giisyohan og lisensya sa Firearms and Explosives Division sa Camp Crame, mao ra g’yod ang pag-subject niini og ballistics test ug itandi ang resulta niini sa record nga gitipigan sa FED.
Kun ako’y polis nga gitugyanan sa maong trabaho, pwerteng sayona gukdon niining maong mga abusadong security agency operators, apan dili na lang ko motug-an og unsaon.
Akong balikon, ang mga polis nga gitugyanan niining maong gimbuhaton, nasayod kun unsaon pagkontrolar o pagpakgang sa binuang apan wala lang nila tinud-a. Dili ba?
Tungod kay ang armas nga giisyu sa mga gwardya, dili man maayo ang kalidad, dili kalikayan nga mosantop sa ilang kaisipan nga basin og dili mobuto.
Kun mobuto man gani, basin og dili maayo moigo sa iyang target tungod sa walay klaro nga “groove” sa iyang sumbohan. Mao nga ang ubang gwardya, mga talawan kun dunay tulis.
* * *
Dili imposible ang pagduda ni Mayor Tomas Osmeña nga duna g’yoy kakonsabo ang mga tulisan – posible nga ang kakonsabo taga bangko o kaha taga La Nueva Supermart.
Ang maong “insider” maoy mihatag og inpormasyon nga ang taga Metrobank magkuha og dakung kantidad diha sa La Nueva atol sa maong higayon.
Nahibaw-an nga sagad g’yod nga matag Lunes, dakung kantidad ang kuhaon sa taga Metrobank gikan sa halin sa La Nueva Supermart sa adlaw’ng Sabado ug Domingo.
Usa ka suod nakong opisyal sa kapolisan mitug-an nga gitan-aw karon nila kun kinsa kaha ang mga “kontak” sa maong mga tulisan.
Na hala, sundon nato kining maong mga isyu.