Sa ngalan ng Wika

Buwan ng Agosto ay Buwan ng Wika

Ito’y kautusang natatak sa bansa;

Dahil sa Tagalog tayo ay nahasa

At sa wikang ito tayo’y dinakila!

 Ang wikang Tagalog noo’t hanggang ngayon

Sa loob ng bansa ito ay yumabong;

Nagsimula ito panahon ni Quezon

Dating presidenteng may puso’t marunong!

 Noo’y wala tayong wikang nakilala

Sapagka’t marami ay magulo silang

Pilit iginiit ay wikaing iba

Dahil rehionalismo -– nasa isip nila!

 Nais ng Ilocos –- wikang Ilokano

Ang sa buong bansa’y pairalin nito;

Gusto ng Bisaya’y Bisayain tayo

At ang Kapampangan kanya rin ang gusto!

 Dahil iba-iba wikang ginagamit

Nakawatak-watak ang puso at isip;

Sa maraming pook hindi maisulit

Kung alin ang wikang katangia’y higit!

 Sa usaping ito’y agad pumagitna

Si Pangulong Quezon na dinadakila;

Siya ay bumuo ng Lupon ng Wika

Upang saliksikin kung alin ang tama!

 Lupo’y nagpasya -– wikaing Tagalog

Ang Wikang Pambansa sa baya’y ihandog;

Sa Luzon, Visayas, sa Mindanao abot

Filipino itong ngayo’y maalindog!

 Sa lahat ng lugar malayo’t malapit

Nauunawaan ang Wikang nakamit;

Taga-ibang lupang dito’y nakasapit

Natuto rin silang sa wika’y gumamit!

 Kaya pasintabi sa ibang wikain

Wikang Filipino ang ating mahalin;

Huwag pagtangkaang ito’y kalabanin

Upang sa ‘sang Wika tayo’y dakilain!