Double joepardy

Admitido ang usa sa mga private prosecutors sa kaso pagpatay ni Atty. Arbet Sta Ana Yongco nga subidahon gyud ang tinguha nga mausab ang hukom sa korte pagtugot sa demurer to evidence nga gisang-at sa duha sa tulo ka nahabiling mga akusado.

Si Atty. Ramon Jose Duyongco miingon nga ang pagtugot sa demurer to evidence nagpasabot og acquittal nila ni Nestor Carol ug Heracleo Rallestan. Buot ipasabot nga mosud na ang prinsipyo sa “double jeopardy” diin dili mamahimong imong taralon sa hukmanan ang akusado sa samang kaso makaduha ka higayon.

Apan dunay dyutay nga purohan nga makapangayo og reconsideration ang prosecution, kinahanglan hinuon nga ilang probahan nga dunay patent error nga nahimo ang huwis sa iyang kamanduan ug iprobar nga dunay grave abuse of discretion amounting to lack of jurisdiction.

Gikinahanglan sab hinuon nga dunay  pagtugot sa solicitor general ang ilang pagpangayo og reconsideration sa hukom ni judge Bienvenido Saniel. Wa pa gyud hinuon kahatag og konkretong ground si Duyongco sa posibling pagpangayo nila og reconsideration sanglit matud niya wa pa siya kabasa sa order.

Si Saniel mibasura sa kaso batok nilang Rallestan ug Carol pinaagi sa pagtugot sa ilang demurer to evidence. Nunot sa pagbasura sa kaso nilang Carol ug Rallestan nitumaw ang kabalaka nga mosunod sab ang kaso sa gitumbok nga triggerman nga si Michel Favila Sr.

Dali hinuon nga gipakalma ni Duyongco ang publiko pinaagi sa pag-ingon nga duna silay lig-on nga ebidensiya batok ni Favila. Kini tungod kay positibo siyang giila sa state witness nga si Eddie Ardita ug sa laing bata nga nakasaksi sa sihang misud si Favila sa panimay ni Yongco niadtong Oktubre 11, 2004.

* * *

Ang gipalagpot nga presidente nga si Joseph Estrada misaad paghatag og P500 mil matag pamilya sa 14 ka mga marines nga nakalas atol sa ambush didto sa Mindanao ug sa laing duha nga nakalas didto sa Bicol.

Gawas niini gipasalig usab niya nga dunay libreng scholarship ang mga anak niini hangtud nga makahuman sa kolihiyo. Dihang gipangutana kon asa kuhaon ang kwarta nga iyang ihatag isip hinabang ingon man igasto sa scholarship, si Erap miingon nga kompleto pa ang pundo nga ilang gitigom kaniadto panahon sa iyang pagkapresidente sa dihang iyang gideklarar ang all out war batok sa MILF.

Sumala pa ni Erap nga sa P100 million nga ilang na tigom kaniadto duna pay P40 milyones nga nahabilin niini sa pagkakaron nga maoy iyang gamiton. Ambot og naunsa nga pagkahitabo nga nahimo mang personal nga foundation ni Erap ang Kawal Filipino Foundation? Abi ba nako og wa ni niya angkuna kaniadto nga iyaha sa dihang gipasanginlan nga iyang gigamit sa money laundering activity?

Si Erap midugang nga adto pod niya kuhaa ang ibayad sa scholarship sa mga anak sa mga namatay nga sundawo gikan sa iyang Erap Para sa Mahirap Foundation. Matud niya nga ang iyang sweldo gikan pa niadtong mayor siya sa San Juan hangtud nahimo siyang presidente sa nasud tua niya ibutang ang tanan ug wa siyay gikolekta niini bisan usa ka dako tungod kay matud niya alang ni sa mga kabus.

Ang mga nakadungog wa kapugong nga miingon nga giluod sila sa pamahayag ni Erap.

* * *

E-mail:   [email protected]