Goodbye Sugbuak!
Human sa piniliay, halos tanang mananaug dinhi sa probinsiya sa Sugbu mga kaalyado ni Gobernador Gwendolyn Garcia. Tungod niini, piang na ang oposisyon tungod kay halos tanang dagkong posisyon sa probinsiya gilangkat man sa administrasyon.
Nunot niining kadaugan sa administrasyon ni Garcia, nawad-an na usab og pako ang mga tigpasiugda sa lakang paghiwa og tulo ka probinsiya gikan sa Sugbu. Kini gumikan usab sa ilang pagkaparot sa nakalabay’ng piniliay.
Ang mga tigpasiugda sa Sugbuak nga sila si kanhi Rep. Simeon Kintanar (second district), Antonion Yapha (third district) ug Clavel Asas-Martinez (fourth district) pulos nawad-an na og impluwensiya human sa ilang pagkapildi sa malabay’ng eleksiyon.
Tungod kay dili na siya makapasubli alang sa Kongreso didto sa ikaduhang distrito, mihunong una sa politika si Kintanar. Apan ang iyang ig-agaw nga buot mopuli sa iyang puwesto sa Kongreso gipildi sa beteranong politiko nga si kanhi gobernador Pablo Garcia.
Didto sa ikatulo nga distrito, gipildi sa ilang piniliay pagka-kongresista ang asawa ni Yapha nga si Estrella sa bagitong politiko nga si Pablo John Garcia, ang anak sa kanhi gobernador ug manghod sa kasamtangan nga gobernador. Kahinumdoman nga gipildi usab ni Gobernador Garcia si Yapha sa ilang kumbati alang sa labing taas nga puwesto sa Kapitolyo.
Samtang didto sa ikaupat nga distrito, wala usab magsilbi ang anak ni
Niining pagkapildi sa tulo ka kongresista kinsa mga dagkong haligi sa oposisyon sa probinsiya, ato na sigurong makita ang kamatayon sa Sugbuak, at least, sulod sa tulo ka tuig. Kini gumikan usab kay walay makapadayon niini didto sa Ubos Balay Balauranan.
Tungod lagi sa pagkawalay dagkong mga tigpaluyo niini karon, sigurado gayud nga abogan lamang ang lakang sa Sugbuak sulod sa kaban sa Kongreso. Apan kun aduna may mga lakang pagbuhi sa Sugbuak, dili gayud kini makaani og suporta gikan sa ubang mga magbabalaod sa Ubos Balay Balauranan gumikan kay wala na sa puwesto ang tulo ka nagmugna niini.
Karon nga patay na ang Sugbuak, panahon na sa kasamtangang pamunoan sa probinsiya nga tutokan ang mga proyekto alang sa kalamboan didto sa tulo ka distrito niini.
Dili usab ikalimod sa atong mga opisyal sa Kapitolyo nga sa nakalabay nga katuigan, nagkulang gayud sila sa pagtagad sa maong mga distrito tungod sa pagrebenta sa ilang mga representante sa Kongreso.
Niining panahona nga patas na ang pagtagad sa namunoan sa Kapitolyo sa unom ka distrito sa probinsiya, dili halayo ang kahiusahan nga matagamtaman alang sa tumang kalamboan sa mga Sugbuanon.
Ang mga sinyales sa pag-asenso natagamtaman na sa Sugbu ug ang kulang mao lamang ang kahiusahan aron nga hingpit kini nga matuman. Wala g’yuy kaayohan alang sa mga Sugbuanon kun magkawatakwatak sila tungod lamang sa personal nga interest sa pipila kinsa mga hakog sa gahom.
* * *
Ipadala inyong mga reaksiyon sa [email protected]
- Latest
- Trending
