EDITORYAL – Magpadayon na ang kabugnaw?

Sa pagsuwat niini, aduna nay kahilum ang mga kampo ni Mayor Tomas Osmeña ug Gobernador Gwen Garcia.

Kini naobserbahan ug gikalipay sa Arsobispo sa Sugbu nga si Ricardo Kardinal Vidal.

Matud pa sa halangdong Kardinal kun kini nga situwasyon magpadayon hayan nga masibot siya sa pagpakigsulti sa duha ka nagkabingkil nga lider sa Sugbu.

Kahinumdoman nga niadtong init pa kaayo ang panagbangi ni Osmeña ug Garcia, ang Arsobispo misuway sa pagpatunga ubos sa kondisyon nga aduna usay ceasefire sa duha ka kampo. Apan gisalikway kini sa duha, nagpadayon ang sinukliay sa masakit nga mga pulong.

Ang Kardinal nanghinaut nga magpadayon kining ceasefire sa duha ka kampo. Ug kami mag-uban sa maong panghinaut kay wa gyuy kaayohan nga naani ang Sugbu gikan niadtong mga binayloay og ataki.