Ambot lang

Duha na lang sa 80 ka barangay sa siyudad sa Sugbu ang wa maapektohi sa illegal nga drugas ug kini mao ang Agsongot ug Binaliw, mga barangay nga nahimutang sa bukirang bahin sa siyudad. Nadugangan na usab og usa ang mga barangay nga seryosong naapektohan sa problema sa illegal nga drugas kay gikan sa napulo nahimo na kining onse. Kini ang gitaho sa Vice Control Section sa atong kapulisan dinhi sa Sugbu kansang figures ilang gibasi sa taho usab nga ilang nadawat gikan sa Barangay Anti-Drug and Advisory Council kon Badak. Hinuon matod pa ni konsehal Jun Pe miubos na usab ang gidaghanon sa supply sa illegal nga drugas dinhi sa Sugbu.

Naunsa na ba ang kampanya nato sa illegal nga drugas ina kay moubos midako naman hinoon kini. 

Human pasanginli sa police nga nangawat og dokumento sa kaso sa illegal nga drugas sa iyang kliyente, gibulgar ni Atty. Alex Tolentino, kanhi presidente sa Integrated Bar of the Philippines Cebu City Chapter ang iyang giingon nga matud pa standing policy sa piskaliya ug kapulisan nga kon mahitungod sa drugas ang kaso ipasaka gayod kini sa hukmanan may ebidensiya man kini o wala. Nunot niini giawhag karon sa abogado ang Department of Justice sa paghimo og pakisusi niining maong binoang.

Kun tinuod man ugaling kining pasangil ni Atty. Alex Tolentino, angayan ug dapat lang gayod kining susihon sa atong departamento sa hustisya.Kay hugot man tood ug atong gihingosgan pagmaayo ang pagkampanya batok sa illegal nga drugas apan dili usab maayo nga atong ibaliwala ang kagawasan alang niadtong mga tawo nga napasanginlan lamang sa salaud nga way basihanan. Dili makatarunganon ngadto sa mga napasanginlan nga pagastuhon sila og kwarta ug hikawan sa ilang kagawasan bisan kon ang mga pasangil way basihanan gumikan lang sa standing policy nga gisunod sa atong mga piskal ug police.

Ang reklamo ni RTC Executive Judge Fortunato De Gracia mahitungod sa mga police nga nagpabadlong ug nagtinonto sa ilang mga pagpanakop ug nga tigpayuhutan og ginadiling drugas maoy nakapahadlok nako sa dili pagsuporta niining giingong standing policy nga gisagop karon sa mga piskal ug kapulisan. Usahay man ugod ang atong mga police manakop ug mga tigpayuhutan og ginadiling drugas dili aron sa ingon sulbaron ang suliran sa drugas kun dili aron sa ingon panapion lamang ang ilang mga dinakpan.