EDITORYAL - Problema sa traffic

Maayo tong gipahigayon ang public hearing kabahin sa traffic diha sa Banilad-Talamban area lakip na ang giplanohang flyover diha sa maong dapit.

Gituki pag-ayo ang problema ug ang mga gitanyag nga solusyon sa maong suliran ug nakab-ot ang pipila ka mga butang nga angay’ng buhaton samtang gipaubos pa sa makuti nga pagtuon ang giingong solusyon.

Ang flyover, pananglitan, gisugyot nga himuong six-lane dili lang kay four-lane kay paglatas sa katuigan nagkinahanglan na og halapad nga agianan sa mga sakyanan ang maong flyover. Unya ang dan nga mokonektar sa maong flyover kinahanglan palapdan usab.

Sugyot sa mga tigpaniid nga dili dali-dali pag-implementar sa mga proyekto alang sa pagsulbad sa trapiko sa maong lugar kay basin mapalpak lang ug mausik ang kuwarta.