Promo sa cellphone

Karong panahona nga uso kaayo ang paggamit sa cellphone, nauso usab ang pagpasiugda og promotion pinaagi sa cellphone. Mokalit lang og sulod sa inbox sa atong cellphone ang text bahin sa promo. Magbalik-balik ra ba. Hasol kaayo kini ilabi na kun aduna kitay dinalian nga trabaho kay mogugol man gayod kita’g panahon sa pag-erase niini. Makahasol gayod kini sa mga tiggamit og cellphone.

Dugtong niini, nakadawat kog text nga nagkanayon: “Sir, kanang taga Globe, ba, sigeg padala og promo sa text. Bisag dili ta interesado magsige gyud og padala. Samok kaayo. Makadisturbo. Kaduha na ko nagpadala nimo og text message ug hinaot nga inyong tagdon ang akong reklamo kay dili lang ako ang gihasolan niini. Daghan kaayo mi.” -- 0926-6807008 (July 5, 2007--01:06:48pm)

Daghang salamat sa imong text. Daghan bitaw ang mireklamo nianang promo sa Globe nga gipaagi sa text. Hasol kaayo kay hasta   kaduha mopadalag text sa promo sulod lang sa usa ka adlaw. Hinaot unta nga inigkapatik niining maong lindog, gihunong na sa globe ang mao nilang promo. Bisan wala kanay pinugsanay apan ang kahasol nga masinati sa ilang mga subscriber dili kabayran og pila ka peso.

* * *

Sa laing bahin, ang tag-iya o naggamit sa cellphone number 0905-8613451 mipahibalo kanako nga naghitak na sab kuno ang drugas sa may Pulpugan, Consolacion. Iya na kuno kining gi-refer sa kapolisan sa Consolacion. Gihatagan na nilag detalyeng kompleto ang hepe ug mipasalig nga ila kining panid-an.

Hinuon, hangtod sa pagsulat niini, gitaho sa atong texter nga wala pa gyoy aksiyon ang kapolisan. Wala pa sila mohimog pagpaniid maong misumbong siya dinhi sa pinobre tang lindog. Manghinaot lang kita nga inigkapatik niining lindog, nakahimo na og tukmang lakang ang kapolisan sa Consolacion kalabot sa gikatahong naghitak nga drugas sa Pulpugan. Tinud-a ninyo ang pagpaniid, Sir. Ang inyong aksiyon gikinahanglan sa nagpakabanang mga lungsoranon.

* * *

(Sumbong ug reklamo? Text sa 0910-8105522)