Ang Dios Miingon
Pamalandong Matag Domingo
Hulyo 22, 2007 Ikanapulog-Unom nga Domingo sulod sa tuig
Mga Pagbasa: Gn. 188:1-10a/Col. 1:24-28/Lk. 10:38-42
Samtang gibasa ko kining maong bahina sa ebanghelyo nahinumdom gyud dayon ako sa akong kaugalingong kinaiya ug batasan. Sa pagkatinuod lang nahisama ko kang Marta nga kanunay lang nagkapuliki. Niadtong seminarista pa lang ako, murag kapoyan na lang ang si bisan kinsa nga magtan-aw kay ako kanunay’ng nagkapuliki sa bisan unsang matang sa mga gimbuhaton. Og karon nga pari na ako, akong nakit-an nga dili tanang busy dunay mahinungdanong gibuhat. As if we are just acting like busy buddies. Apan sa katapusan, mahurot na lang ang enerhiya sa mga butang nga wala diay igong padulngan.
Bililhon kaayo ang paghilom ingon man ang pagpaningkamot nga magpatidlum sa mga mahinungdanong hitabo sa kinabuhi sa tawo. Si Maria bisan pa man kun wala molihok alang sa Ginoo, apan nahimong mas nakapahimuot kaayo sanglit gibuhat man niya ang labing bililhong buhat sa pagpaminaw sa mahinungdanong mensahe nga gihatud ngadto sa iyang pangdungog.
Usa ka paagi sa paghatag og bili sa tawo o dinapit mao ang pagpaminaw kaniya. Daghan kanato ang kusganon kaayo nga moabi-abi ug mangandam apan nahikalimot sa paghatag og tahod sa presensiya sa atong bisita pinaagi sa maablihong pagpaminaw kaniya sa panahon nga ipaambit na niya ang iyang sugilanon sa kinabuhi. Ikaw maantigo ka bang maminaw?
* * *
E-mail: paiskaris@yahoo.com