EDITORYAL - Makahimuot sab si Tomas

“No, no” ang reaksyon ni Mayor Tomas Osmeña sa bag-o pang gi-adoptar nga polisiya sa Kapitolyo diin gidad-an ang mga empleyado sa pagkusmod samtang sila nagtrabaho.

Daghan ang nahimuot sa reaksyon ni Tom O sa maong “no simangot” nga kasuguan sa gobernador. Wa ig-a sa Mayor ang “kaaway” niyang Gobernadora kinsa maoy nipakanaug sa gihisgutang polisiya. Nikomedya pa hinuon kini.

Matud ni Tom dili gyud siya mo-implementar og susama nga polisiya kay seguradong siya maoy unang masilotan. Ang Mayor nagkanayon:

“Mao nay reklamo sa mga tawo nga kanunay lang kong magmug-ot, akoy unang masilotan ana, ayaw nalang uy.”

Suma pang Tomas bahala nang nakasimangot ang empleyado sa City Hall basta maayo lang nga serbisyo ang ilang ihatag ngadto sa publiko.

Midugang si Tomas sa pag-ingon: “Naa bitaw mga empleyado diha nga kusog mongisi pero daghan sab og kuwarta ang hunos kay kurakot man.”