Kahadlok sa mga militante

Sugod kagahapon gipatuman na sa sa gobyerno ang Anti-Terrorism Law, ang balaud nga dugay rang gipangayo sa Amerika sa Pilipinas, isip kaalyadong nasud sa kalibutanong gubat batok sa terorismo.

Gisugat sa mga protesta ang pagpatuman sa balaud, sigun sa gipaabot ang mga militanting grupo nga gitumbok sa military nga mga legal fronts sa mga rebelding New People’s Army, maoy nag-una sa pagsupak niini.

Ilang basihanan sa protesta mao ang kabalaka nga mosaka kuno og maayo ang paglapas sa tawhanong katungod nunot sa pagpatuman sa maong balaud. Matud pa sa mga militanting grupo nga ang pagpatuman sa maong balaud maoy paglingi sa panahon sa martial law diin si bisan kinsa kunong gidudahang kontra sa gobyerno mamahimong dakpon ug prisohon bisan ug wa pay kaso.

Sigun sa probiso sa bag-ong balaud, ang kapolisan ug military gihatagan og gahum pagpriso sa mga gisuspetsahang terorista sulod sa tulo ka adlaw bisan og wa pa silay kaso sa hukmanan.

Ang maong gidugayon mamahimo pang malugwayan depende sa pagtugot sa Municipal Trial Court ug sa Commission on Human Rights. Ang maong probisyon maoy gigamit nga puhonan sa mga militanting grupo pagpanghadlok sa katawhan aron pagdani kanilang mouban sa protesta pagsupak sa maong balaud.

Ang wala itug-an sa mga militanting grupo mao ang bug-at nga mga “safety measures” nga nasukip sa maong balaud aron malikayan ang pagpangabuso sa militar ug kapolisan niini.

Ang kabug-at sa multa nga gipahamtang sa balaud alang sa mga masakpang moabuso niini, igo na nga makakombinsir sa mga mahigugmaon sa kalinaw nga mga molopyo aron suportahan ang pagpatuman niini.

Pananglitan ang pagpabayad og multa nga P500,000 matag-adlaw nga pagkabilanggo sa usa ka tawo nga gidakop tungod sa pasangil nga terorista apan giabswelto sa korte. Kini lang daan igo na nga magmatngon ang tigpatuman sa balaud tungod kay bisan pa  ang tibuok nilang retirement kuwang kaayong ibayad.

Busa di kong kasabot nganong ang mga militanting grupo hugtanong misupak niini kon  wa silay dautang motibo. Di kong motoo nga kaalyado sila sa mga NPA nga gitumbok sa Amerika nga usa sa mga teroristang grupo apan tungod sa ilang pagsupak niini di kalikayan nga magduda hinoon ang publiko.

Klaro ang akong baruganan nga uyon ko’s pagpatuman niining maong balaud. Apan gikinahanglan lang siguro ang hustong panahon sa paghimo niini. Pananglitan, kinahanglan ang Implementing Rules and Regulation sa balaud tungod kay mismong ang CHR nga usa sa dunay mahinungdanong papel pagpatuman sa balaud admitido nga wa silang masayod kon unsay ilang buhaton.

Si regional director Alejandro Alonzo miingon nga kini tungod kay hangtud karon was ilang kadawat og kopya sa IRR sa balaud.

* * *

E-mail:  [email protected]