Wala ibayad

Niining bahina sa akong lindog, maoy akong hatagan og pagtagad kining text sa usa ka magbabasa nga nagkanayon: “Good day, Sir. Aduna koy dako nga problema kabahin sa akong SSS. Usa ako ka security guard. Duna koy loan nga P6,000 ug dugay na kaayo kini nga naimpas kay ako man gyud nga gitigom ang mga resibo matag deduct sa among agency. Pero wala man diay nila ibayad ang ilang gi-deduct sa akong suweldo. Dako na hinuon kini kaayo karon, miabot na og P12,000. Unsa man ang angay nakong buhaton? Magpaabot ko sa imong tubag.” -- 0905-9558620 (April 28, 2007 --15:17:21)

Gihatag sa atong texter ang ngalan sa iyang agency apan nakahukom kong dili lang kini ibutyag in fairness sab ngadto sa maong ahensiya ilabi na nga wala nato makuha ang ilang habig. Ang akong ikatubag ngadto sa atong texter mao nga modangop siya sa buhatan sa SSS. I-refer gayod niya ngadto sa SSS kining maong suliran kay ang maong buhatan seguradong makahatag niyag advice kun unsay angay niyang buhaton.

Alang nimo, higalang texter, ayaw gayod kini dugay-dugaya. Dad-a ang tanang mga resibo nga imong gihiposan aron ipakita kini ngadto sa taga SSS. Kini maoy magmatuod nga nakaimpas ka na pagbayad sa imong loan. Dinhi unya matuki kun naunsang pagkahitaboa nga wala man matibhangi ang imong balayranan sa imong loan ug gani miabot na man kini og P12,000. Sakit na kaayo kining maong hitabo ilabi na sa atong kaigsuonan nga igo-igo ra intawon ang kinitaan sa pagpanarbaho.

Maayo gani kay nakahipos kag resibo. Magamit mo kana sa pagpakitag kalig-onan nga nakabayad ka na sa imong loan, ang problema kay wala man kini i-remit sa imong agency, ambot unsay hinungdan nga ila man kining gitan-ogan. Sa higayon nga makaabot na sa SSS ang imong reklamo, posibleng sila na ang motawag sa atensiyon sa imong agency aron pag-esplikar bahin niining nahitabo sa imong loan.

Kun maikog ka sa imong agency nga modiretso ka lang sa SSS, labing maayo nga makigsulti ka una sa imong ahensiya aron pangayoon ang ilang katin-awan. Pero kun dili ka matagbaw sa ilang esplikasyon, diretso na sa buhatan sa SSS. Aron walay trampas, pangayo sab og advice sa usa ka abogado.

* * *

 (Sumbong ug reklamo? Text sa 0910-8105522)