Pabling lisud nga ma-speaker kun way suporta ni GMA

Padayon karon ang intramurals sa mga sakop sa Kampi ug Lakas bisan pa man kun nahuman na ang piniliay. Sa wa pa ang piniliay nagsumpaki na ang duha ka partido gumikan sa pag-ilogay sa bendisyon ni Presidente Gloria Macapagal Arroyo nga maoy mamahimong opisyal nga kandidato sa administrasyon sa lungsod, dakbayan, lalawigan ug distrito. Ang Kampi partido sa Presidente samtang ang Lakas iya kining kaalyado. Karon ang pagka Speaker na usab sa ubos balay balauranan ang ilang giilogan nga miresulta na sa panagbangi nila ni DILG Secretary Ronaldo Puno, Chairman ug Kongresista Luis Villafuerte sa Camarines Sur, Presidente sa Kampi.

Si kongresista Villafuerte dayag kaayong nangampanya alang sa pagka Speaker ni Kongresista Pablo Garcia sa segundo distrito sa lalawigan sa Sugbu. Matud pa ni Villafuerte nga aduna silay 45 ka mga sakop sa Kampi, 20 ka mga sakop sa Lakas ug 75 pa ka mga kongresista gikan sa nagkalain-laing partido ang mosuporta sa pagka Speaker ni Noy Pabling. Apan gisupalpal siya ni Secretary Ronaldo Puno. Matud pa sa naulahi, dili atbangan sa Kampi ang pagka Speaker ni Jose De Venicia. Pero wa masayod si Puno sa iyang gipanulti, tubag usab ni Villafuerte.

Akong nadunggan si ninong Cerge Remonde nga miingong dili manghilabot si Presidente Arroyo niining intramurals sa Kampi ug sa kaalyado niining partido - Lakas sa pagka Speaker diha sa ubos balay balauranan. Maayo ang hukom sa presidente. Ang presidente gikinahanglan nga aduna kini maayong panglantaw sa umaabot nga mahitabo diha sa iyang palibot aron iyang maalkontrahan ang unsa mang plano nga pagpakanaug kaniya diha sa Malakanyang. Ang Ubos balay Balauranan mao ang iyang lig-on ug katapusang depensa aron magpabilin siya sa puwesto kay didto sa Senado piangon na ang iyang mga sundawo tungod sa atong nakita sa resulta sa piniliay pagka senador nga nag-una ang kandidato sa iyang kontra sa politika ug nangiwit ang iyang mga kaalyado.

Numero gihapon diha sa ubos balay balauranan ang importante sa presidente aron magpabilin siya sa puwesto. Sa milabay’ng piniliay 92 ka mga kongresistang Lakas ug 65 usab ka mga kongresistang Kampi ang midaug. Kon paluyohan sa presidente si Pabling segurado gayod nga mobalitok ang Lakas ngadto sa opposition ug dinhi impeach na ang presidente ug kon dili man, mahitabo unya ang cold war tali sa presidente ug sa Lakas. Kon suportahan usab sa presidente si Jose de Venecia, masagmuyo usab kaniya ang iya mismong partido. Busa aron way magmahay ug seguradong makaabot pa siya sa 2010 nga termino palayo lang una sa away. Mao ni ang taktika sa mga maro sa politika, kinahanglan kang segurista.