Kining tigbakay anaa gayod sa bisan asang dapit. Bisan gani didto sa amo sa Bohol nauso pag-ayo ang tigbakay. Basta mag-abot ang mga sugarol sa sabong, segurado gyud nga may mahitabong tigbakay. Diha man ganiy higayon nga didto gyud mismo sa among barangay gipahigayon ang tigbakay. Pero nasimhotan sila sa mga polis mao nga nagkatibulaag silag panagan sa dihang mitungha ang mga awtoridad. Pero diha gyuy wala makaipsot sa mga kamot sa kapolisan ug nadakpan.
Dugtong niini, nakadawat kog text nga nagkanayon: "Good day, Sir. Naay nagsigeg tigbakay diri sa Marigondon, Lapu-Lapu City. Kada Domingo gyud ni. Daghan na kaayong nahitabong kawat diri." -- 0926-4792721 (April 10, 2007 -- 14:29:21)
Atong sangpiton ang atensiyon sa mga barangay opisyal diha sa Marigondon, Lapulapu City kalabot niini. Kamo man gyud ang mas nakaila sa mga molupyo diha sa Marigondon nga inyong kakonstituwente, palihoga kunog monitor kun kinsa kanila ang nahilambigit sa kalihokan sa tigbakay. Matud pa sa atong texter, daghan nang kaso sa pangawat nga nahitabo diha. May kalambigitan man kini sa tigbakay o wala, angay gayod santaon kanang kalihokan sa tigbakay kay illegal man kanang buhata.
Maayo sab unta kun mointerbener niini ang kapolisan sa Lapulapu aron daling masikop ang mga responsable sa pagpahigayon og tigbakay. Nagtuo kong identified na kanang maong mga tawo diha sa maong dapit sa ilang pagkasugarol og manok. Okey ra baya kun manugal ka sa buwangan. Ayaw lang diha sa tigbakay kay dili kana ang tukmang dapit alang nianang maong matang sa sugal.
Bahin sa mga kawat nga nahitabo diha sa Marigondon, labing maayo nga hugtan usab kini sa pagbantay sa mga barangay polis ug ingon man sa mga sakop sa PNP. Ang kasagaran ra bang mahitabo, walay kasayoran ang kapolisan nga may kinawatay na diay nga nahitabo sa usa ka lugar tungod kay wala may mitaho niini sa ilang buhatan. Awhagon nako kadtong mabiktima sa pagpangawat nga magpa-blotter gayod sa buhatan sa kapolisan aron ilang masayran kun unsa ang mga krimen nga nahitabo sa ilang hurisdiksyon ug ila kining kaaksiyonan.
* * *
(Sumbong ug reklamo? Text sa 0910-8105522)