Local imports rise 10.4 percent in March

Motoo ko nga ang kopya sa mga election returns nga anaa karon sa mga tagdumala sa Cebu Citizen’s Involvement and Maturation in People Empowerment and Liberation kon C-Cimpel wala gayod mabinuangi.

Ang kampo ni congressional aspirant Benhur Salimbangon nakakuha og kopya sa 15 ka election returns sa Bogo nga gi-photo copy gikan sa orihinal nga election returns nga kopya sa C-Cimpel, apan dili ang kampo ni Salimbangon ang nagpakopya niini.         

Gitataw g’yod ni Monsenyor Boy Alesna, ang tigpamaba sa C-Cimpel, nga wala nila itugyan sa kampo ni Salimbangon ang orihinal nga kopya kay aron nga kon dunay pagkwestyon niini, mahimong ila kining mapakita ug matandi ang mga numero.

Hinoon nakasabot ko nga ang mga abogado sa kampo ni congressional aspirant Celestino Martinez III, ang kontra ni Salimbangon sa politika, mokwestyon g’yod sa maong mga election returns nga anaa karon sa C-Cimpel.

Natural nga ila g’yod nga kwestyonon kay kon dili nila kini himoon, unya mao kini ang basihan sa pag-canvass sa mga botos, maalkanse man ang nagsweldo kanila unya mamatud-an pa nga dunay pagpanikas batok sa ilang kaatbang nga si Salimbangon.

* * *

Makita man god nga sa kopya sa election returns nga nahuptan sa C-Cimpel, ang “figures” niini lahi kay sa “figures” didto sa election returns nga gisumiter sa Comelec aron unta maoy i-canvass sa mga sakop sa Board of Canvassers.

Basi sa mga election returns nga nahuptan sa C-Cimpel, nagpakita nga si Martinez nakakuha og labaw nga botos kay kang Salimbangon, apan gipaburot pa kini pag-ayo didto sa election returns nga gisumiter sa Comelec.

Unya, dunay daghang mga botos ni Salimbangon nga gipakunhoran, samtang gidugangan ang kang Martinez. Wala ko mag-ingon nga si Martinez ang nagsugo niini apan duna g’yoy tawo nga maoy naninguha aron siya modaug.

Aron masabtan niadtong wala mahibawo, ingon man god niini. Dunay unom ka kopya ang election returns. Ang unang kopya maoy para sa Comelec, ang ikaduha nga kopya isulod sa ballot box kay gamiton kon dunay protesta.

Ang ikatulo ug ika-upat nga kopya adto sa nag-unang mga partido, sa laktud administrasyon ug oposisyon. Unya ang ikalima adto sa mga election watchdog, sama sa C-Cimpel ug Namfrel.

Kon imong kwentahon pag-ayo, ang mga tawo nga mamirma sa maong mga election returns dili mahitabo nga maglahi-lahi ang pirma kay sila ra man gihapon ang mga sakop sa Board of Election Inspectors.

Buyno, aron mahibaw-an g’yod ang kamatuoran kon piki ba ang maong mga election returns, gipadala sa Manila ang maong mga kopya sa gikwestyon nga election returns aron masuta ang kamatuoran.

Kon masuta gani nga piki kini, kadtong mga naghatud sa maong mga election paraphernalia ngadto sa kadagkoan sa Board of Canvassers maoy angay nga pasakaan og kaso. Sigurado ko nga kon dili sila ang nagmaniubra sa tikas, nasayod sila kinsa ang naghimo niini.

* * *

Alang kanako, modayeg g’yod ko niadtong mga kandidato nga andam modawat og kapildehan. Wala man malilong sa maong mga kandidato kon sila napilde o nakadaug kay may kopya man kamo bisan sa mga certificates of votes.

Mao bitaw nga gidayeg nako kadtong mga kandidato dinhi sa dakbayan sa Sugbu ug diha sa Mandaue nga wala magpadiki-diki sa pagdawat sa ilang kapildehan.

Ingon g’yod niana ang eleksyon, dunay mapilde ug dunay makadaug.