Philippine firm wins $1.3-billion deal with UK firm

Sa miaging bugnong lugaynon adunay pipila ka mga dapit sa nasud nga usa lang ka pamilya ang gipili aron sa ingon maoy mopadagan sa renda sa kagamhanan. Kasagaran usab sa mga napili kauban ra sa partido. Sa lungsod sa Aloguinsan sa lalawigan sa Sugbu mayor ang asawa, bise mayor usab ang iyang bana. Ang anak mayor samtang ang iyang inahan maoy iyang bise mayor didto sa lungsod sa Daanbantayan. Otso-otso usab ang nahimong resulta sa piniliay dinhi sa dakbayan sa Sugbu diin ang tanang kandidato sa Bando Osmeña Pundok Kauswagan gikan sa mayor hangtod sa pagka konsehal pulos milusot ug wa gayoy gikan sa opposition.

Kining maong resulta sa piniliay nagpakita lamang nga ang ubang mga botante wa pa masayod o ba kaha wa pa masayod sa pagkamahinungdanon sa gitawag og Check and Balance in Government. Misaka naman tood ang gidaghanon sa mga botanteng kamao nang mopili og kandidato apan murag wa pa makita nila ang pagkamahinungdanon sa opposition diha sa atong gobyerno.

Didto sa Amerika partikular kaayo ang mga Amerikano sa ilang pagboto. Kasagaran sa ilang iboto mao ang nagagikan sa managlahing partido. Sa Amerika kon Republican ang Presidente, democrats ang mayorya sa ilang lehislatura ug kon democrats ang ilang Presidente, republican usab ang mayorya sa lehislatura, kini sa tuyo nga adunay check and balanace sa ilang gobyerno.

Ang Check and Balance usa sa pinakamahinungdanon nga feature sa sistema sa gobyerno nga presidential. Mao kini ang moiway sa abuso nga posibling mahimo sa mga naglingkod ug mga nagpadagan sa renda sa kagamhanan. Sa Check and Balance ang mga mata sa ehekutibo ug lehislatura nagtinutukay ug nagbinantayay sa matag usa aron dili kini makahimo sa pagpangabuso. Sila ang bantay sa atong interest diha sa gobyerno.

Pero kinsa naman ang makabantay sa atong interest kon ang mayor asawa ug ang bise mayor kinsa maoy modumala sa konseho mao ang bana? Kinsa naman lang ang makabantay sa atong interest diha sa gobyernong municipal kon ang anak mayor ug ang inahan mao ang iyang bise mayor? Kinsa naman lang unya ang motan-aw sa kahiwian nga posibling mahimo sa ehekutibo sa siyudad sa Sugbu nga pulos man kauban sa partido ang mga sakop sa konseho?

Kun aduna may kahiwian ug pangabuso o ba kaha pagpangawkaw unya sa ilang pagdumala, ayaw pagreklamo kay gitugutan ninyo sila nga makahimo niini pinaagi sa inyong pagpili sa asawa ug bana, inahan ug anak ug parihang ka partido.