Labihang kisikisi ni kanhi Mandaue City CouncilorPontico “Tex” Fortuna sa pasangil ni Konsehal Glenn Bercede, kandidato pagka bise mayor sa Team Honesty, nga biktima siya sa maniobra sa mga Fortuna. Nga maoy hinungdan nga samtang nag-una si Mayoral Candidate Jonas Cortes batok ni Jonkie Ouano, nauwahi si Bercede batok sa iyang kaatbang nga si Carlo Fortuna, anak ni Tex.
Matod ni Bercede nisumbong niya ang mga barangay kapitan ug ubang mga lider mahitungod sa “special operations” ni Fortuna pagtaptap sa iyang ngan bugti sa kuwarta nga gipabaha. Apan nitataw si Tex sa iyang pagtawag sa “Arangkada” sa DYAB Abante Bisaya nga wa sila manaptap sa sample ballots ni Bercede ug labaw nang wa nila i-junk si Jonkie.
* * *
Si Kongresista Nerissa Soon-Ruiz dunay lahi nga katin-awan sa pagtumaw sa Cortes-Fortuna tandem sa Mandaue. Matod niya si Bercede aksidente lang nga naduhig sa mas dakong maniobra sa mga Quisumbing sa pagpadaog ni Luigi pagka kongresista sa bisan unsang paagi.
Nipasabot si Ruiz nga samtang hingpit nga gibuboan sa Norkis og hinabang si Cortes, nga maoy kapartido ni Luigi, gisaboran sab og hinabang ang mga kaatbang ni Cortes nga silang Acting Mandaue City Mayor Ading Seno ug Atty. Magno Dionson. Laing “special operations” sa mga Quisumbing, segun ni Ruiz, mao ang pagbayad sa mga lider ni Jonkie aron dad-on silang Luigi ug Cortes.
Kon tuohan ang kasayuran ni Ruiz, wa tuyoa nga naigo sa mga Quisumbing si Bercede ug wa tuyoa nga natabangan si Fortuna.
* * *
Si Tex kumbinsido nga di maniobra kon dili ang talagsaong katakos nga napakita nang Carlo sa nagkalainlaing kapasidad, apil nang pagka nasudnong presidente sa Phil. Councilors League, ang nakaaghat sa mga Mandauehanon pagpili niya.
Si Bercede sa iyang bahin wa magduda nga gi-junk siya ni Cortes ug ni Luigi. Kon si Fortuna man gyoy modaog, andam gihapon si Bercede nga motabang sa bag-ong pamunoan ni Cortes pagtuman sa ilang gisaad nga mas ligdong nga pagduma ug pangalagad sa Mandaue.
* * *
Ang pagkasuspenso ni kanhi mayor Teddy Ouano tungod sa eskandalo sa Asean Summit maoy gituohang nakapalukapa sa kandidatura ni Jonkie. Tungod sa kapakyas sa ilang mga turutot pagbuwag sa anak gikan sa mga eskandalo sa amahan, napugos sila pagpasalig sa mga botante nga makabalik si Teddy sa City Hall sa wa pay eleksiyon.
Apan epektibong nabasura ni Seno ang sayop nga pasalig pinaagi sa pagbukas sa iyang matag rally sa kabaranggayan pinaagi sa pangutana, “Kinsay mayor ron sa Mandaue?”
Salamat sa mga suga sa ruta sa summit nga naapil na sa listahan sa labing mahalong mga suga sa tibuok kalibotan, mahimong makaangkon nag kinutoban ang 18 ka tuig nga way putol nga pamunoan sa mga Ouano nga napakyas pag-atiman sa labing batakang mga panginahanglan sa mga Mandauehanon.
* * *
Email: leo_lastimosa@abs-cbn.com