Magic ink

Hangtud karon, wala gihapon mapapas sa akong tudlo ang marka nga daw agi sa indelible ink.

Nagpasabot kini nga kon tinuod nga ang maong "magic ink" gikan sa kampo sa opposition dinhi sa dakbayan, usa kini ka epektibong paagi nga kadtong mga dumadapig sa ilang kontra dili na makabotar.

Atol sa press conference didto sa opisina ni Vice Mayor Michael Rama kaniadtong Lunes sa mga alas 11 sa buntag, gipresentar sa bise mayor ang gamay’ng garapa nga may sulod nga tin-aw nga daw tubig.

Gibunyagan nila kadto og "magic ink" kay kon mayab-an ka niadto, mora lang og tubig nga mabasa apan paglabay sa usa ka oras, inanay kini nga makamugna og marka nga ang kolor daw sa indelible ink nga gamiton sa Comelec atol sa eleksyon.

Mituyo ko sa pagpabutang sa akong kumingking aron personal nga makasinati. Tuod man, usa ka oras gikan sa pagbutang sa maong magic ink, namarkahan ang akong tudlo.

Dunay miingon nga dali ra usab kuno kining matangtang, apan gikan niadtong Lunes hangtud kagabii nga akong gisigihan og sabon, gibalik-balikan sa paghugas, dili gayod matangtang.

Daw sa mituhop ilawom sa panit. Nagpasabot kini nga kon gamiton kini bisan sa petsa Sabado pa, dili gihapon makabotar ang mabutangan niini kay naa man gihapon ang marka.

Tambag nako sa mga botante, ayaw gayod kamo pagpalingla. Basin og bayran mo sa mga lider sa kandidato unya ingnon mo nga walay kaso kon butangan ang inyong tudlo kay wala may kolor ang magic ink.

Ngilngig tuod kining maong plano. Ang report nagkanayon nga siniguro ang himoon sa mga mamalit og botos. Kay nanagana nga tingali’g koprason lang ang kwarta nga ibayad, botangan nila’g magic ink ang tudlo.

Resulta, dili g’yod tuod makabotar ang mabutangan.

* * *

Nalipay ko sa mga feedback gikan sa akong kahigalaan diha sa Mandaue nga nagpabiling nag-una si Jonkie Ouano sa kampanya.

Ang komentaryo nila mao nga linghod pa kaayo si Jonkie nga mosulod sa politika, apan nakasabot usab sila nga angayan si Jonkie nga modumala sa Mandaue tungod sa iyang maayong panglantaw.

Kabahin sa higpit nga kaatbang ni Jonkie, nalipay lang ko kay gipakalma nila ang ilang mga dumadapig nga init unta kaayong makigbatok sa mga kaatbang nila sa politika.

Nalantawan g’yod nako nga kon si Jonkie na ang mahimong mayor sa Mandaue, daku g’yod ang kausaban sa maong dakbayan.

* * *

Dinhi sa dakbayan sa Sugbu, nakarga gayod sa listahan sa mga kandidato ang ngalan sa lima ka milansar pagka mayor. Apan sigurado ko nga duha ra ang nailhan sa katawhan.

Sa laktud nga pagkasulti, gahugaw-hugaw lang sa listahan sa Comelec ang ngalan niining maong mga kandidato.

Nagpatuga-tuga sila paglansar nga dili gani makasugakod sa paghimo og citywide campaign.

Dunay usa ka kandidato nga nagpapilit og "machine copy" nga campaign material diha sa D. Jakosalem ug misaad nga libre ang bayad sa mga lisensya sa mga PUJ drivers kon siya mapili.

Unsa ikaw ang magbuot? Granting arguendo nga modaug ka pagka mayor, nagtoo ka ba g’yod nga paluyohan sa mga konsehal ang imong plano?

* * *

Wala na, mapahiyumon na kaayo si Mayor Tomas Osmeña. Hinoon, usahay moingon siya nga walay bisan usa ka kandidato nga makasiguro sa iyang kadaugan, apan tan-aw nako, sigurado na si Tommy nga modaug.

Dili ikalimod nga si Mary Ann delos Santos maayo, utokan ug dunay abilidad nga magmayor. Apan tungod sa dinali-dali niyang paglansar, kini maoy makapahisukamod niya sa kapildehan.