Ang gasto kun magsenador

Sa gitugot sa election laws nga 5 pesos nga gastuonon sa mga kandidato sa pagka-senador sa matag usa ka botante, gibana-bana nga mogasto ang matag usa ka kandidato og 225 milyones ka pesos kun ibasi sa 45,041,777 ka mga rehistradong botante sa tibuok nasud as of March niining tuiga. Kining maong gidak-on sa gastoonon dako ra kaayo kini sa iyang madawat nga 35 mil ka pesos nga suholan matag bulan kun modaog isip senador o 420 mil ka pesos matag tuig o 2,520,000 ka milyon ka pesos lamang sulod sa unom ka tuig.

Sa pagkakaron sigon sa gihimong pagtoon sa A.C. Neilsen pipila na ka mga kandidato sa pagka-senador gikan sa Team Unity ang migasto na og kapin sa usa ka gatos ka milyon alang sa ilang mga political ads. Kun imong itandi ang gasto ug ang madawat niining suhulan unsaon man kaha pagbawi sa maong kandidato sa iyang nagasto kun makalingkod na siya sa pagka senador?

Si Senador Miriam Defensor Santiago adunay tubag niining maong pangutana ug mao kining mosunod:

Ang usa ka senador aduna kini siya fixed nga monthly budget nga 1.7 ka milyon alang sa iyang opisina ug mga staff. Aduna usab kini 760 mil ka pesos matag buwan nga gahin alang sa iyang pagbiyahi ngadto sa gawas sa nasud. Aduna upod siyay makuha nga 20 milyones ka pesos nga kickbacks sa iyang pork-barrel funded nga mga proyekto.

Ang usa ka senador aduna usab kini gahin nga 773 mil ka pesos matag bulan alang sa suhulan sa iyang mga staff ug 998 mil ka pesos matag bulan alang sa abangan sa opisina, utilities, mga supplies ug mga gastuonon sa iyang mga pagbiyahi dinhi sulod sa nasud. Aduna usab siya''y madawat nga 560 mil ka pesos matag tuig alang sa iyang pagbiyahi sa gawas sa nasud ug 200 mil ka pesos nga capital outlay. Kining tanan pulos confidential busa dili subject to audit ug ang sobra sa ilang gahin kun aduna man ugaling puyde nang dili iuli sa panudlanan sa atong kagamhanan.

Mao kini ang hinungdan kun nganong adunay daghan nga gusto gayong magsenador bisan dako kaayo ang ilang gastoon kay wa ra man diay tuig bawi na ang ilang gasto.

* * *

Pagkapeligro na ba dinhi sa Sugbu, miabot naman diay dinhi sa ato ang mga tawo nga mohunos na og kinabuhi tungod ug alang lang sa ilang giingon nga pag-alagad sa katawhan. Niadtong miaging semana gipusil patay si Sta. Fe, mayoralty candidate Illustrisimo sulod mismo sa dapit nga atong gituhoan nga aduna kitay kaseguroan - ang compound sa Kapitolyo.

Ingon ani na ba ka seryoso ang ubang mga dumadapig ug mga kandidato sa ilang tinguha nga moalagad? Mokutlo na gyud og kinabuhi aron lang sila maka alagad sa katawhan?