Comelec control

Nahukman na sa kapolisan nga irekumendar ang pag-ubos sa comelec control sa Bantayan Island sa umaabot nga eleksiyon aron kalikayan ang posibleng dugo-ong hitabo mugna sa pagpusil patay kang mayoralty candidate Rogelio Illustrisimo Sr.

Si Chief Supt. Silvirio Alarcio Jr., hepe sa kapolisan dinhi sa rehiyon, mitug-an sa Lintunganay sa DYLA nga ilang irekumendar ngadto sa Comelec ang pagpa-ubos sa isla sa bantayan sa comelec control.

Gawas niini, ila sab nga irekumendar nga isipong areas of concern ang nahabiling mga lungsod sa 4th district tungod sa kabalaka nga manakod sa ubang mga lungsod ang kagubot didto sa isla.

Si Alarcio miingon nga nunot niini ilang gipaabot nga dugangan ang pwersa sa kapolisan didto sa maong dapit. Gipaabot sab ang paghatag og police escort sa mga kandidato pagkamayor nga nakadawat og mga hulga sa ilang kinabuhi.

Usa sa mga dapit nga gitumbok ni Alarcio nga init ang panagtigi sa mga kandidato mao ang Daanbantayan. Nagkanayon si Alarcio nga ilang hatagan og escort ang mga kandidato pagkamayor sa maong lungsod.

Admitido ang kapolisan nga nabalaka sila sa sitwasyon karon didto sa isla human sa pagpatay ni Illustrisimo tungod kay wa silang masayod sa huna huna sa mga dumadapig. Busa aron kapugngan ang posibleng dautang mga plano sa mga supporters, haum nga mapaubos ang maong isla sa comelec control.

Apan ang tinguha pagpaubos sa isla sa comelec control hugtanong gisupak sa kampo nilang kongresista Clavel Martinez. Matud nila nga ang angayan kunong ipaubos sa comelec control mao ang Kapitolyo kay didto mahitabo ang pagpatay ni Illustrisimo ug dili ang Isla sa Bantayan.

Laing rason mao nga posible kunong mga hadlok na hinuon ang mga tawo nga manggawas ug mobotar atol sa eleksiyon tungod sa kadaghang mga polis ug mga sundawo nga armado.

Wa kong kasabot kun unsay nahadlokan sa mga Martinez kun ipaubos sa comelec control ang Bantayan. Di ba mas makaayo man hinuon ni nila aron mabantayan gyud nga malinawon ang eleksiyon ug way mga pagpanikas, tungod kay ang kanunay nilang balikbalikon mao nga gitikasan sila kaniadto hinungdan nga napildi ang iyang bana nga si Junie.

Usa ka baliko nga lansis ang pasangil nga mangahadlok ang mga botante nga mogawas aron pagbutar kun dunay daghang mga polis nga magbantay. Kun mao nga mga hadlok ang mga tawo sa polis, unsa may kapuslanan nga padayon tang magbaton niini?

Di kaha maayo nga ato nalang pud nga bungkagon ang organisasyon sa kapolisan kun mao man gani nga mga hadlok na hinuon ang mga tawo kanila? Ang mga tawo nga mahadlok sa kapolisan mao lang kadtong mga criminal ug nakahimo ug salaud.

Busa kon way gitaguan ug gusto gyud nilang Martinez nga limpiyo ug way tikas ang eleksiyon, angayang ilang hangpon ang pagpaubos sa Isla sa Bantayan sa Comelec control inay nga ilang supakon.

* * *

Nihatag na ang gobernador og kwentada sa kinatibuk-ang nagasto sa katukuran sa Cebu International Convention Center. Segun sa iyang kwentada moabot og P581 milyones ang kinatibuk-ang nagasto.

Human sa paghatag og kwentada, gihatagan dayon og ultimatum sa igsuon sa gobernador si Crisologo Saavedra nga isibog ang mga kasong iyang gipasaka ug mangayo og public apology aron di siyang mahiagum sa mga kaso.

Si Saavedra nga klarong nakuyawan sa hulga ni Garcia nidalidali pagsibog sa usa sa tulo ka mga kaso nga iyang gisang-at batok sa gobernador. Gihimong rason ni Saavedra nga nasayop kuno ang libro nga iyang gibasihan sa kaso, hinungdan nga nasayop sab siya sa iyang kiha.

Ang tinuod nga nahadlok gyud siya, tungod kay sigurado kong wa magti-aw ang kampo sa gobernador sa ilang hulga. Wa man gani palabya sa gobernador ang pamahayag ni Acting Deputy Ombudsman Virginia Palanca Santiago.

Si Garcia mikiha gyud ni Santiago didto sa Ombudsman Manila tungod sa gipakita kuno niining bias. Matud sa kampo sa gobernador nga giyak-an sa Ombudsman ang dugay na nga mga kaso diha sa ilang opisina apan gihatagan og espisyal nga atensiyon ang kaso batok niya.

Lakip sa mga kasong wa pa gyuy resulta ang imbistigasyon sa Ombudsman mao ang pagdeposito ni kongresista Clavel Martinez sa P26 milyones gikan sa iyang PDAF ngadto sa iyang personal bank account.

Ang kontrobersiya sa fertilizer scam batok ni kongresista Antonio Yapha ug ang kaso nga gisang-at sa usa ka Iglerina Caballero batok ni kongresista Nerisa Soon Ruiz tungod sa gikatahong ill-gotten wealth.

Ang tinuod dugay rang naresolve ang maong mga kaso diha sa Ombudsman Visayas, apan ang miyaka niini mao si Ombudsman Merceditas Gutierez. Si Gutierez mimando human siya moasumir sa iyang pwesto nga adto na sa iyang buhatan ang approval sa tanang mga kaso.

* * *

E-mail: [email protected]