Mamumuo

Karong adlawa mao ang adlaw sa mga mamumuo. Tungod niini, aduna unyay magkadaiyang kalihukan nga pasiugdahan ang mga nagkalainlaing kahugpungan sa mga anak sa singot. Karong adlawa ato na usab unyang madungog ang naandan nang mga reklamo sa atong mga kaigsoonang mamumuo sama sa ubos nga suhulan ug wa paghatag sa saktong mga benepisyo. Ang atong gobyerno mohatag na upod unya sa iyang naandan nang saad ug lipat-lipat ngari kanatong mga anak sa singot nga dugay nang nag- antos sa mga pag-abuso sa atong mga amo nga mipahimulos pagmaayo sa atong kusog aron sila mabusog apan kitang nagwad-wad pagmaayo nagniwang ug pasmado.

Ang mga mamumuo sa atong batakang balaod gikonsiderar nga katambayayong sa pagpalambo ug pagpauswag sa nasud tungod sa iyang puwersa ug nahatag nga kaayohan apan subo lamang nga palandungon nga ang uban kanato gibaliwala lamang sa gobyerno sa nasud nga atong gitabangan. Gikuhaan na kita sa kasiguroan sa atong pagpangempleyo ug basta-basta na lamang kita nga kuhaan sa bandi sa atong panginabuhi. Tungod sa nagbahang katawhan nga nanginahanglan og trabaho wa nay pupanaganang mopalayas kanato ang atong mga amo o kapitalista gikan sa atong mga trabaho nga maoy naghatag og kinabuhi sa atong pamilya kana kay aduna pay daghang naglinya sa gawas sa opisina nga nanginahanglan ug nag-apas usab sa trabaho. Ang kakuwang sa trabaho dinhi sa nasud maoy nagdasig sa mga kapitalista sa pagpangabuso ngadto sa ilang mga empleyado.

* * *

Tabanog kuno ang hinungdan kun nganong nahagsa ang huey helikopter nga gipanag-iya sa Philippine Air Force kaniadtong miaging Sabado diha sa Humay-Humay dakbayan sa Lapu-Lapu. Ang rason gibasi sa nylon nga nakita sa mga imbestigador sa rotor sa helikopter nga mihimo og pakisusi human kini mahagsa ug mikalas og 9 ka kinabuhi. Katohoan dili kining pasiunang resulta sa imbestigasyon nga gihimo sa mga taga Air Force. Sayonan mo nianang mas kusgan pa diay ang tabanog kay sa huey helikopter sa atong Air Force kay mahagsa man kun makabangga og tabanog. Ang resulta sa imbestigasyon palusot na lamang kini sa atong Air Force aron matabunan ang tinuod nga hinungdan sa paglikay nga mao unya kini ang himuong target sa atong mga kaaway. Sa pagkatinuod kining atong mga abyong ig-gugubat (huey) mga biya na kini sa mga Amerikano, ato lamang kining gidawat kay wa tay salapi nga magamit sa pagpamalit og mga bag-ong abyong ig-gugubat. Gidawat kini sa atong kagamhanan sa dihang gihatag kini kanato sa pamasin nga makatabang kini sa atong Air Force nga ang gisaligan mao lamang ang mga Tora-tora (abyong ig-gugubat) nga kun tiraduron usab matagak.