Duha ka semana nalang...

Duha ka semana sa dili pa ang piniliay, nagsunod-sunod na ang pagpanggawas sa mga resulta sa survey sa pagka-senador. Kung kaniadto, nangharos ang mga taga oposisyon, karon, halos patas na ang nasu''d sa dose ka giilogang pwesto. Samtang naglalis na ang mga dumadapig sa mga kandidato sa mga nanggawas nga resulta sa survey ug samtang wala nay halos undang sa kampanya ang mga kandidato aron dili mauwawan sa mogawas unyang resulta sa piniliay, ingon og sa wala hatagi og bili sa publiko kung kinsa ang mga tawo nga nagpaluyo sa mga survey ug kung angayan bang katohoan ang ilang mga gipagawas nga resulta.

Duha ka semana sa dili pa ang elekyon, nagbag-o sa ilang mga istilo sa propaganda ug ''political advertisement'' ang mga kandidato. Kung kaniadto, ika lima lang sa usa ka adlaw mogawas sa telebisyon ang ilang binayrang pahinumdum, karon doble o katuluon pa hangtud nga mapupos ang oras sa campaign ad nga gigahin kanila sa balaod. Iya-iyang pakulo ang mga kandidato sa ilang hamubo nga pasundayag ug pagpangulitawo sa mga botante. Adunay mga kandidato nga nagkugos og bata, may mga gi-indorsar og mga taga ordinaryong tawo, may mga giisa ang kamot sa mga artista, may nakiglamano sa mga tindera, may mga gipasiatab ang pagka-probinsyano ug uban pa. Duha ka semana nalang sa dili pa modagsa sa mga presinto ang mga Pilipino aron iboto ang ilang mga kandidato, nagkapuliki na ang ubang kandidato sa pagpahimutang ug pag-edukar sa ilang mga gitawag og ''watchers'' o magbalantay sa boto. Samtang ang ubang kandidatong may dautang plano aron masiguro ang kadaugan, gitan-aw na unsaon nga makabintaha sa eleksyon sunod buwan.

Kung ang ubang kandidato nagpatabang na og ampo alang sa malinawong piniliay, ang uban posibleng nakigtigum na sa ilang mga bata-bata aron nga maoy manghadlok sa mga botante ug maghatag og kasamok. Kung ang ubang kandidato wala nay halos oras sa pagpahuway gikan sa pagpangampanya, ang uban posibleng nagsugod na og ihap sa salapi nga itubong sa mga magpailad nga mga botante.

Duha ka semana sa dili pa ang eleksyon, wala pay nigawas nga lakang ang Comelec ug ubang ahensya sa gobyerno unsaon paglimpyo ang napuno sa basura nga palibot tungod sa gibulit nga mga posters ug uban pang campaign paraphernalia. Ug hangtud karon, wala pay gitinuod ang Comelec sa ilang saad ug panganti nga may mga kandidatong makasohan ug posibleng madiskwalipika tungod sa paglapas sa ''fair elections act. Hangtud karon, wala pay bisag usa ka kandidatong nangunay sa pagisi sa iyang hulagway nga gipataka og butang sa iyang gisuholang tawo. Hangtud karon, wala pay puas ang pagpamutang ang mga dumadapig sa campaign posters sa ilang mga kandidato sa pagtuong bisan sa kadalanan lang, makabentaha nang daan ang ilang manok.

Duha ka semana nalang sa dili pa ang eleksyon, nagsunod-sunod na ang duguong insidente nga may kalabutan sa politika sa bisan asang dapit sa nasud. Ang mga lugar nga kaniadto hapsay ug malinawon, karon gubot pa sa lukot ang sitwasyon tungod sa pag-ilog sa pwesto ug matud pa, tinguha nilang maka-alagad sa katawhan. Apan pipila lang ba nila ang may kinasing-kasing nga intensyon sa pagsilbi sa katawhan? Pila lang ba nila ang motuman sa ilang mga saad karon diha sa entablado kon o galing mahatagan og higayon nga modaog sa umaabot nga piniliay? Pila lang ba nila ang moda'' sa tingog sa kinabag-an ug motubag sa panginahanglan sa katawhan?

Duha ka semana sa dili pa ang eleksyon, mas maayo sigurong sud-ungon sa mga magpapili ang pait nga kahimtang sa kadaghanan sa mga mamumuo nga hangtud karon nabutang gihapon sa alaot ug wala mahatagi sa igong benipisyo. Angayan sigurong hinuklugan sa mga kandidato unsay iyang mahimo aron makatabang sa mga anak sa singot ug sa pamilya nga nagsalig kanila. Mas maayo sigurong tan-awon sa mga kandidato kung may igo ba siyang kusog ug prinsipyo aron ikumbati ang katungod sa minilyon ka mga Pilipino nga trabahante.

Duha ka semana nalang mahibaw-an na kung kinsa ang mga personalidad nga modala nato sa bag-ong paglaom ug hingpit nga kausaban. Apan samtang nagpaabot ang tanan sa Mayo katorse, mas maayong tan-awon ang tagsa-tagsa ka kaugalingon, hinuklogan ang mga panghitabo sa palibot ug sud-ongon ang kahimtang sa pamilya ug silingan atol ning pait nga sitwasyon sa panahon. Himunduman nga ang imong usa ka boto, nagpasabot na og kabag-ohan ug paglaom sa minilyon ka mga Pilipino. Wala nay panahon aron imo pa ning usikan o ibaligya sa mga politikong hakog ug walay baruganan.