Limitasyon ug ang bokasyon

Ang Dios Miingon
Pamalandong Matag Domingo
Abril 29, 2007: Ikaupat nga Domingo sa pasko sa pagkabanhaw
(Good Shepherd Sunday)
World Day of prayer for vocations
Mga pagbasa: Buh. 13:14,43-52/Gip. 7:9,14:17/Jn.10:27-30

Niadtong seminarista pa ako, pagkaanindot palandongon og sud-ongon ang mga dyakuno nga sa katedral manghapa aron sa paga-ordinahan sa Obispo. Pagka-solemne ug daw sa manlibawot ang imong balhibo sa mga higayon nga masud-ong mo silang mag-ilis na sa ilang bisti sa pagkapari. Butang nga nakatukmod kanako sa pagpamalandong sa ako pud nga kahimtang. Hangtud nga niabot ang higayon nga ako na usab ang nihapa ug sa mga kamot sa Obispo ang ulo ko napandongan ug sa kasulya ug estola ang makasasala nasul-oban. Usa na gyud ako ka pari, apan nakaalinggat ako nga dili na diay managsama ang kaniadto ug karon. Ang pagkapari mao ang gitawag nila og journey ug no return...kini tungod kay ako nakaamgo nga kauban sa maong bokasyon anaa pud ang mga limitasyon...hinuon sa kapasikaran nga kining gasaha gihatag man sa kahitas-an mao nga ako lang gyud usab nga ampingan bisan pa man kun kini nagkahulogan og paghilak ug kahapdos sa mga bunal ug latos nga ginudnod sa kapalaran nga gilatid na sa kinabuhi sa atong pagka-simbahan ug pagkakatawhan.

Uhaw ang kinabag-an karon sa mga maayong mga Magbalantay nga andam molaban kanila batok sa mga lobong manunukob ug sa mga mini nga mga propeta ug sa mga impostor nga pastor. Nangindahay ang kinabag-an sa kultura sa paglaom ug sa maampoon og tim-os nga pag-amoma sa ilang mga magbalantay kang kansang panumpa nagasukad sa pagkapari ni Cristo. Ang pagka-pari ni Cristo maoy bugtong sanglitanan alang sa usa ka ideyal nga pagkapari. Apan lisud kaayo kini ug gani bisan ako nga pari, naglisud man sa pagtuman niini. Apan taliwala sa maong kalisdanan, kinahanglang i-angkla ang kaugalingon ngadto sa Ginoo kay wala man gyud tay mahimo kon wala Siya nga kanato molig-on.

Makabungog ang mga eskandalo nga milaparo sa dagway nga parianon. Makauulaw ang mga hiwing binuhatan namong mga kaparian. Apan bisan pa niini ang kutay sa dugong parianon padayong modagayday sa kaugatan sa matag henerasyon. Dili paigo ang pagpunay lang og panaway ug panghimaraot. Labaw na nga dili pud hamtong ang pagpangayo dayon og pasaylo sa salang nahimo sa kapasikaran nga kini pagausban na pud og laing krimen. Labaw na nga dili lang nato isalig lang sa Dios ang tanan aron balaanon ang kaparian. Hinunoa, duna kitay salabutan ug kagawasan nga gihatag sa Dios aron atong gamiton sa pag-ugmad sa kultura sa bokasyon dinuyogan sa usa ka mabinantayong pag-atiman...sakto gyud ang giingon nga ang simbahan ug ang kalibutan sa kanunay nagkinahanglan og usa ka makanunayong paglimpiyo ug pagpurga!

* * *

E-mail: [email protected]