Politikanhong lantugi

Dinhi sa dakbayan sa Sugbo gihagad sa Genuine Opposition ( GO )ang Bando Osmeña Pundok Kauswagan ( BOPK ) ug usa ka politikanhong lantugi aron makit-an ug madunggan sa mga botante ang mga isyu ug mga plata porma de panggobyerno sa matag habig. Apan ang maong hagit gibaliwala ug gibalibaran sa BOPK tungod kay makapasikat lamang unya kuno kini sa mga kandidato sa GO.

Ang politikanhong lantugi usa ka maayong dapit diin malad-lad sa mga kandidato ug partido ang ilang mga himoon kon ugaling sila na ang makalingkod sa katungdanan. Mao usab kini ang dapit diin mahashasan sa mga botante ang mga programa nga pagahimoon sa mga kandidato kon modaug sila sa piniliay busa dili maayong ibaliwala lamang kini nila.

Ang politikanhong lantugi mao ang dapit diin matubag ang mga pangutana sa mga botante mahitungod sa mga bintaha ug disbintaha sa ilang mga plata porma ug programa sa gobyerno busa angayan gayod unta kini nga himoon ug ipahigayon. Kon ugaling mapahigayon man kini ang gusto nakong paagi nga sundon sa lantugi mao ang paagi nga gisunod sa Amerika sa ilang nga presidential debate nga gipahigayon kay dili samok.

Para nako taphaw ang rason nga mosikat lang ang kaatbang sa politika kon ugaling atubangon kini sa lantugi. Gihikawan sa maong kandidato o partido ang mga botante sa kasayuran nga gusto nilang mahibaw-an. Gihikawan usab niini ang mga botante nga makahimo og maayo hukom sa pagpili kon si kinsa ang ilang tahasan sa pagdala sa renda sa kagamhanan.

Ang partido ug kandidato nga dili mosukol og lantugi mahitungod sa ilang mga plata porma de panggobyerno talawan ug kadudahan nga adunay gitagoan busa dili angayan nga butohan. Niining panahona kinahanglan na kitang magmatngon sa atong pagpili kay layo pa ra ba kaayo ang lain na usab nga tulo ka tuig natong paabuton aron ato silang ilisan diha sa puwesto nga ila unyang huptan. How to be a millionaire Ni Antolin dela Serna

Mao kini ang cover story karon sa Kerygma: How to be a millionaire, diin tungod kay dugay nakong mangandoy nga ma-millionaire ko, nipalit gyud ko, bisan tuod og ila nang giumintohan og 10 pesos ang kopya.

How to be a millionaire: Nia ang imong buhaton:
• (x) Win the lotto.
• (x) Kidnap someone
• (x) Run for Congress
• (x) Marry a rich, old dying man
• (/) Start a business
• (/) Save and invest
• (/) Live simply

Mao kana ang mga choices. Notice nga gimarkahan og X ang first four choices, samtang gi-ckeckan ang last three. Sa ato pa, dili maayo ang nag-unang upat, samtang giisip nga ideal ang katapusang tulo ka choices.

Sa number one, di gyud ko ma-milyonaryo tungod kay wa man koy pusta-pusta sa lotto. Ug lisud alang kanako ang pagkidnap tungod kay wa man koy armas, ug wa koy masugo pagpa-kidnap.

Ug nahibong ko nga ila mang giapil ang paglansar sa Kongreso. Ngano man diay, mga milyonaryo diay na sila si Del Mar, Cuenco, Gullas, Kintanar, Yapha, Martinez, Durano ug Soon-Ruiz? Makapa-milyonaryo diay ning mag-Congressman?

Year of the Pig man kono ron. Di ba nidaku man ron ang ilang pork barrel, kaylagi, Year of the Pork Barrel man kono ron?

Anyway, di gihapon ko ma-Congressman kay wa man koy kwarta, kay dinhi sa ato, ang public service alang lamang sa mga kwartahan. Mao bitawy hinungdan nga wa gyud mo-uminto kining atong nasud, itandi sa ubang mga Asean countries.

Ug kon old maid pa ko ron, lagmit mangita kog foreigner nga datu nga tigulang, kanang himatyon na. Di kaha ta gabaan ini, Dro? Tingali nyag kita hinooy maunang ka-matay.

Anyway, ang last three maoy gi-rekomendar sa Kerygma. Hinoon, wa koy ikasugod og negosyo, wa koy i-save ug walay ika-invest. Ug mapugos gyud ko to live simply, kay wa man koy nahut. Ug di na lang ko mangandoy nga ma-milyonaryo pa.