Manny vs. Darlene

Human sa iyang kadaugan batok sa Meksikanong si Jorge Solis kaniadtong Abril 15 didto sa San Antonio, Texas, lain na usab nga away ang sagubangon ni Manny Pacquiao, ang usa sa mga labing bantogan sa boksing tibuok kalibotan karong panahona.

Karon Mayo 14 gitakda ang maong away. Ug ang iyang kaatbang mao si Darlene Antonino-Custodio, ang kasamtangang kongresista sa South Cotabato ug usa sa mga nag-unang tingog sa oposisyon sa Kongreso.

Pagsang-at ni Pacquiao sa iyang kandidatura, daghan ang nagduda sa iyang kapabilidad pag-arte unya sa hawanan sa Kongreso kon siya gayud ang palarang modaug. Kini tungod kay dili niya ikalimod nga mubo ra siya og kinaadman ug kulang sa eksperinsiya.

Hinuon desidido gayud ang bantogang boksidor nga mag-kongresista. Matud niya, ang iyang pagdagan gitumong aron iya kuno nga matabangan ang mga pordoy sa iyang distrito nga iyang giingong wala tagda sa mga anaa sa gahum

Apan dili gayud magsilbi si Pacquiao nga sa iyang pamoksing kamulo usab siyang magtikawtikaw sa politika. Akong nakita nga dako gayud kini og epekto sa iyang malamboong karera sa boksing, diin siya nahimong inila sa kalibotan.

Daan nang misaad si Pacquiao nga bisan pa man kon miitsa na siya sa iyang kalo ngadto sa politika, dili gayud niya biyaan ang pamoksing tungod kay dinhi siya ug ang iyang pamilya nabuhi. Apan ang dakong pangutana kon duna ba siyay mahimo pagpanday og mga balaod tungod niining iyang kinaadman nga kutob lamang sa pamoksing ug ginagmay''ng negosyo?

Dili kini pagpanghimaraut sa kapabilidad sa labing datong atleta sa kasaysayan sa Pilipinas. Apan bisan kinsay pangutan-on, wala gayuy nada ang pagsulod ni Pacquiao sa politika tungod kay, sa ako nang gikaingon, dako kini og epekto sa iyang pamoksing.

Hinuon gumikan lagi sa iyang pagkasikat, dako usab og tsansa si Pacquiao nga modaug sa piniliay. Liboan sa iyang distrito nga natabangan sa iyang salapi gikan sa pamoksing ang walay dudang mosuporta gayud sila kaniya karong umaabot nga eleksiyon.

Apan dili usab mabasta-basta ang iyang kaatbang. Si Custodio gikan sa pamilyang tang-an na sa politika ug dako na usab og nahimo sa South Cotabato.

Si Custodio dili lamang usa ka maanyag nga makadani og botante. Aduna siyay karisma nga sama sa magnet nga mosugyot sa iyang mga konstituwenti pagbotar kaniya. Bisan pa sa iyang ka bata, mipakita na kini''g maayong abilidad sa Kongreso, bisan pa man kon anaa siya sa oposisyon.

Gani iyang gipakita kon unsa siya ka maayong politiko sa dihang usa siya sa misugat ni Pacquiao pag-uli sa boksidor sa General Santos City human sa iyang kadaugan didto sa Texas sa niaging semana. Wala usab bahiri og pamolitika sa babayeng kongresista ang away ni Pacquaio sa dihang apil siya sa liboang nagtapok aron pagsaksi sa kumbati sa maong boksidor.

Sa laktod nga pagkasulti, makamao gayud modula sa politika si Custodio. Ug siguradong kutasan gayud si Pacquiao sa ilang kumbati pagka-kongresista sa piniliay karong Mayo.

Pareson ang duha ka batan-on sa ilang panagsangka karong eleksiyon. Si Pacquiao usa ka sikat nga boksidor kinsa mianig milyones ka mga magdadayeg tungod sa iyang maayong performance sa ring samtang si Custodio usa ka maanyag ug dunay karisma nga dili usab kadudahang mohakot og mga botante.

Ug kon kinsay mogawas nga mananaug kanila sa piniliay, ato na lamang atangan!

* * *

Ipadala inyong reaksiyon sa [email protected]