Si Pacman ug ang nasudnong bandila

Kaniadtong Domingo (Sabado sa Amerika) nakatutok ang mata sa kalibutan didto sa San Antonio Texas aron sa pagsaksi sa away tali nila ni Pacman ug Coloradito. Sa ikawalong hugna sa away gipahanga na usab ni Pacman ang tibuok kalibutan human niya pakamanga sa canvass ang wa pay pildi nga si Coloradito. Laing dungog nga gihatag ni Pacman ngadto sa katawhang Pilipinhon. Apan samtang naghatag siya og dungog sa katawhang Pilipinhon, gipakauwawan usab sa iyang mga dumadapig ang nasud sa Pilipinas.

Kon nakabantay mo ang atong nasudnong awit giawit kini ni Geneva Cruz sa dili tukmang tempo. Ok na lamang unta kini para kanato bisan dili mao ang tempo kana tungod kay hapit man usab kita makahilak sa iyang pag-awit sa atong nasudnong awit. Pero ang nakapait, gipun-an pa gayod kini sa dihang giisa ang atong nasudnong bandila nga may nakamarka nga VOTE MANNY nga maoy nakapabarog sa balhibo sa akong tingkoy ug nakapatangkag sa akong dalunggan. Sayonan mo niana hasta ang simbolo sa atong nasud wa pasayloa, giapilan pa gayod og politika.

Usa ka way pagtahod ug usa ka pagbugal-bugal ngadto sa atong bandila ang gihimo niadtong mga dumadapig ni Pacman. Kon si kinsa man kini sila, kinahanglan silang mataral sa atong hukmanan.

Ang atong bandila giampingan ug gipakamatyan sa atong mga katiguwangan kay mao kini ang simbolo sa atong nasud gani sa mga flag raising ceremony aduna pay nakabantay niini nga mga sundawo o mga police unya sa uban markahan lang og Vote Manny? Sa pagkadaghang papel o panapton nga masuwatan ang ato pa gayong bandila ang ilang nahuna-hunaan? Gihimo kitang kataw-anan sa mga dumadapig ni Pacman sa tibuok kalibutan.

Ang ato pong nasudnong awit giusab upod ang tempo, ina kay marcha gihimong maski unsa na lamang, magdepende na kini sa gusto sa artistang mokanta niini. Naunsa naman ta ani. Sa tibook kalibutan kita ray adunay nasudnong awit nga lain-lain ang tempo sa pagkanta. Kita ra usab ang adunay bandila nga gimarkahan og Vote Pacman. Ambot lang.