EDITORYAL — Abusadong fratmen gikabalak-an

Nisugmat nasad ang sakit sa mga sakop sa pipila ka notoryus nga fraternity.

Ning milabay nga pipila ka adlaw duna na say mga panghitabo sa patay diin ang mga suspek ug biktima giingong mga fratman.

Ang fratwar nagpadayon. Oo, matag karon ug unya apan nagpadayon. Ug sa among nahibaw-an wa pay bisan usa mga abusadong suspek ang nasikop ug nakasuhan. Labaw sa tanan, way bisan usa ang nasilotan ug natambog sa prisohan.

Kinsa may mosikop ug mopatarong sa sinikop nga abusadong sakop sa fraternity?

Kining maong pangutana mao say pangutana sa daghang mga lungsoranon nga nabalaka ug naterorisar na sa mga pagpangabuso sa pipila ka mga abusadong fratmen kinsa motira ug mopatay bisan pa gani sa ila lang gidudahan nga kaaway sa ilang pundok.