Inamigong tambag

Giaghat ni kongresista Tony Cuenco ang National Bureau of Investigation nga mohimo kini og lakang sa pagpakigsabot-sabot ngadto kang Joseph Yu nga makapaubos sa silot niini aron mosulti kini sa iyang mga kauban sa paghimo og ginadiling drugas sa dakbayan sa Mandaue.

Kining maong lakang ni kongresista Tony Cuenco dili makahatag og kaayohan sa atong kampanya batok sa ginadiling drugas. Ang nahisgutang lakang magdasig lamang hinoon kini sa ubang adunahan sa pagpadayon sa ilang dautang kalihukan tungod kay ang atong gobyerno makigsabot-sabot man lamang diay kini ngadto kanila. Dili usab maayong paminawon sa katawhan nga ang atong mga investigating agencies wa makakuha og kasayuran gikan sa ilang dinakpan aron mapalig-on unta ang kaso nga giatubang batok niini ug sa iyang mga kaubanan.

Pagka dili ba katuohan nga hangtod karon wa gihapon makakuha og mga kasayoran ang NBI, PDEA ug kapulisan sa mga tawong kakonsabo ni Joseph Yu sa paghimo og shabu sa dakbayan sa Mandaue. Wa bay katakos sa paghimo og imbestigasyon ang mga ahensiya nga ako nang nahisgutan sa unahan? Ang katakos sa National Bureau of Investigation, Philippine Drug Enforcement Agency ug kapulisan sa paghimo og imbestigasyon mahitungod sa mga kaso sa drugas kutob ba lang ngadto sa ilang mga dinakpan nga dili makatingal ngadto kanila? Epektibo ba lang sa pagkuha og kasayuran sa ilang imbestigasyon ang nahisgutang ahensiya ngadto sa mga kabus nilang dinakpan ug dili ngadto sa mga dinakpan nga mga dato?

* * *

Tambag nako ngadto ni Jonas Cortes ug Glen Bercede, moundang na lamang sa ilang pagsaway sa gitukod nga merkado sa Mandaue nga matud pa nila porbidang mahala tungod niining mosunod nga mga rason. Una, sama ra nga ilang gisagpa ang ilang kaugalingon sa ilang pagsaway sa merkado nga mahal kaayo, kini tungod kay apil sila sa mihatag og pagtugot sa maong merkado, busa apil usab sila sa mabasol sa katukuran niini. Ikaduha molutaw lang hinoon nga dili sila tinood nga tigpanalipod sa interest sa mga Mandauehanon kana tungod kay wa nila kwestiyona ang katukuran sa merkado bisan pa man sa pasangil sa ka mahal niini tungod kay kauban pa sila sa mga Ouano kaniadto. Ikatulo, molutaw lamang nga wa silay baruganan ug uyon-uyon lang kini sa mga kalihukan nga pagahimoon bisan pa man kini og disbintaha sa mga Mandauehanon tungod kay kapartido pa nila ang nagpasiugda niini.