Kabag-ohan

Usa ka pari ang kanunay nakong atangan sa matag semana santa tungod sa iyang hamubo apan lantip nga pamalandong atol sa mga adlaw nga atong gihandom ang pagpasakit, pagkamatay ug pagkabanhaw ni Kristo. Si Fr. Orbos sa usa sa iyang mga pamalandong miingon, adunay duha ka dalan nga gipapilian ang kahitas-an kanato. Ang usa patag, sementado, tul-id ug diretso-diretso sa impiyerno. Samtang ang usa ka dalan, libaong, batuon, dili sementado ug labaw sa tanan, dili tul-id. Ang maong dalan ang maghatod kanato sa kalipay nga walay kataposan.

Sa makadaghang higayon, mi-kwestyon ta sa atong kaugalingon unsa ka lisud ang mabuhi ug magpuyo nga matarong. Kanunay natong basolon ang atong kaugalingon tungod kay bisan og gi-unsa na nato pagpaningkamot nga mamahimong matarong ug layo sa kasaypanan ang atong kinabuhi, padayong magpaduol ang tentasyon nga magpakasala. Siguro, ato nalang dawaton ang kamatuoran nga gikaluhuan natang daan og kasal-anan. Sa usa ka nasud nga daghang kahiwian nga mahitabo matag karon ug unya, dili imposibleng matintal ang matag usa sa pagpakasala.

Ang nakapait sa katilingban karon nahimo nang kabahin sa inadlaw-adlaw nga pagpuyo ang paghimo og dautan ug pagpakasala sa isig katawo ug mismong sa kinaiyahan nga iyang gipuy-an. Ug samtang nagkadugay, mas naglisud na ang katawhan sa pag-ila sa kung unsa ang sayop sa kung unsa ang husto ug matarung. Samtang naglakat ang katuigan, dili sayon alang sa mga tawo ang pagpili sa unsay husto tungod kay halos magkapareha ra ang dagway sa kung unsa ang sayop sa sakto.

Sa kadaghan sa gitawag og "double standard" sa atong komunidad, lisod na alang sa Pinoy ang pakigkumbati sa unsay matarong sa kung unsa ang dili. Samtang nanawagan ang uban og dili pagpamalit og boto atol sa eleksyon, apan adunay uban nga nagtuo nga kini lang ang tukmang solusyon aron batukan ang bating pamunuan sa usa ka politiko o dinastiya. Samtang ang simbahan nag-ingon nga patas sila sa pagtratar sa piniliay ug sa mga tawo nga magpapili sa eleksyon, mopagawas ang simbahan og mga maayong mithi sa kaniadto nga angayang ituboy sa piniliay. Ug samtang daghan sa mga Pilipino ang nanaway sa mga politikong kurakot, sugarol, himabaye ug daghan og bisyo ug ilegal nga binuhatan, mosuporta gihapon sila ug moboto sa mga samang politiko tungod kay suod nilang sakop sa pamilya o higala.

Nahain naman ang gitawag nato og hustisya? Hustisya nga dili alang sa mga dinaogdaog, gilupigan o biktima sa krimen. Apan hustisya sa ato mismong pagkatawo, pagka-Pilipino ug pagka Kristyano.

Tungod kay samtang atong gipasigarbo ang atong pagkatawo, adunay daghang mga okasyon o panahon nga mosukod sa atong moralidad ug prinsipyo. Samtang atong gipanghambog ang atong gawi, adunay panahon nga kita ra usab mismo ang magbuling-buling sa atong kaugalingon sa lapok.

Puno sa hagit ang unang semana human gisaulog nato ang semana santa. Kabag-ohan! Sa pagkabanhaw sa manunubos, nahatagan og gahom ang atong pagtuo, nabutangan og katumanan ang mga saad ug naputos sa paglaom sa bag-ong kinabuhi ang matag usa kanato. Ang nakapait lang, kay samtang atong gibayaw ang Ginoo tungod sa iyang pagkabanhaw gikan sa mga namatay, wala pa nato matubos ang atong kaugalingon gikan sa lugar nga walay kasiguruhan. Ang eleksyon sa Mayo ang usa ka okasyon aron masukod kung nakaamgo naba kita sa dugay na natong pagpakaaron ingnon o pagkahipokrito.

Human sa semana santa, balik na usab sa kampanya ang mga kandidato. Human sa pipila ka adlaw nga bakasyon, entablado na usab ang puntirya sa mga magpapili karong eleksyon. Human makahinulsol sa ilang mga kasaypanan, balik na usab sa mga saad ang sagad sa mga politiko. Ug human ta makapahuway sa makabungog nga mga saad, balik na usab ta og pamati sa usahay makabanhaw og patay nga mga pulong sa pipila ka buot mangulo kanato. Ang tinud-anay nga kabag-ohan sa atong kagamhanan, sa piniliay magsugod o mismo kanato magsugod!