Mumhong gahin alang sa mga pordoy

Niadtong nakalabay nga mga semana, ang Arroyo administration mianunsiyo og gahin nga usa ka bilyon ka pesos aron pagpakigbatok sa kapobrehon nga grabe na kaayong nakagamot sa nasud.

Ang maong lakang isip sanong sa order ni Presidente Gloria Macapagal-Arroyo alang sa implementasyon sa mga programa pag-aswat sa sektor sa mga pordoy gikan sa grabe nga kagutom.

Matud pa sa ulahing survey didto sa kaulohan, misamot na kuno ka daghan sa mga Pilipino ang gipanggutom. Kini tungod usab sa kakulang sa ilang kita gumikan usab sa ka-walay klarong trabaho.

Kahinumduman nga ang pagmugna'g minilyong trabaho maoy usa sa mga programa ni Presidente Arroyo ilalum sa iyang 10-point agenda sukad sa iyang pagdaug sa piniliay niadtong 2004. Apan mora og nagkulang sa pahinumdom ang kagamhanan tungod kay hangtud karon, wala pa matuman ang mga saad niini.

Hinuon sa unang paglantaw, daghan ang nag-ingon nga pangilad lamang sa kagamhanan ang P1 bilyon nga gahin ning panahon sa kampanya alang sa piniliay. Kini gumikan kay tipaka lamang kini ikumpara sa pipila ka bilyones nga magasto sa gobiyerno alang sa eleksiyon aron pagsiguro sa kadaugan sa mga kandidato niini.

Ang hilabihan ka dako sa gasto sa gobiyerno alang sa piniliay atong makita pinaagi sa mga komersiyal sa mga kandidato niini aron pagsiguro sa ilang kadaugan. Dili gayud makaipsot sa pagbatikos ang gobiyerno gikan sa ubang sektor nga mialegar nga hilabihan kuno ka dako ang natampo sa partido sa administrasyon niining grabe ka mahal nga mga komersiyal.

Tungod lagi kay ang umaabot nga piniliay nagtangag man sa political survival ni Presidente Arroyo, iya gayud nga buhaton ang tanan aron modaug ang iyang mga kandidato aron paglikay sa realidad nga huyang siyang mapalagpot gikan sa katungdanan kun ang oposisyon mao unya ang maghari sa duha ka sangay sa Kongreso.

Kini ilabina kun makapasar ang laing impeachment complaint nga siguradong ipasaka batok kaniya human unya sa eleksiyon. Kun mahitabo kini, mogimaw na usab ang ngil-ad nga sungay sa politikanhong krisis sa nasud.

Kun sinsero gayud ang kagamhanan pagsulbad sa problema sa kapobrehon sa nasud, kinahanglan dili lamang kini mogahin og mumhong budget aron lamang tapin-an ang nag-umidong kaso sa mga gipanggutom mugna sa problema sa panalapi sa mayoridad sa mga Pilipino.

Hinuon ang katawhan wala mag-apas nga makahimo og milagro ang kagamhanan aron paghatag og malamoy ngadto sa mga kabos tulo ka beses matag adlaw. Ang gikinahanglan mao lamang ang politikanhong kaakohan pagpatuman sa mga programa niini alang sa mga kabos.

* * *

Ipadala inyong reaksiyon sa [email protected]