Kagutom sa Pilipinas

Nag-gahin ang Pilipinas og usa ka bilyon ka pesos alang sa temporaryong alibyo sa kagutom nga nasinati sa atong katawhan. Kay matud pa sa balita, daghan sa atong mga kaigsoonan ang gibati og kagutom karon. Apan ang maong solusyon temporaryo lamang ug dili mao ang tinuod nga tubag sa maong problema. Ug mao nga dili kita maka-ingon nga mawagtang ang kagutom pinaagi sa maong programa.

Primero, adunay mga pagduda ang tingalig mapareha lamang sa Fertilizer Fund ang maong kwarta, tungod lagi kay ting-eleksyon naman. Kining maong mga pagduda dili kalikayan, apan dili usab tingali usa ka basehanan sa pag-husgar nga ang Anti-Hunger Task Force walay mahimo sa pagsulbad sa problema. Tan-awon lang gud usa nato og unsay lakaw niini. Sama sa kwartang gigasto sa ASEAN Summit , mag-kwentas klaras unya ta kon mosalir ba gyud kining maong programa ug magamit ba gyud sa eksakto ang maong kwarta.

Ang tinuod, bisag usa ka gatos ka bilyon ka pesos pa ang gahinon sa atong goberno aron ipamalit og pagkaon alang sa atong mga katawhan, magpabilin gyud ang kagutom kon ang kinauyokan sa maong problema dili nato hatagan og seryosong paningkamot.

Labihan ra kadaghan ang atong mga tawo ikomparar sa atong mga abot o produkto. Bisan ang atong humay nga kada adlaw nato gikaon, ato gihapong gi-import. Ania sa Pilipinas ang labing bantugang mga siyentipiko ug laboratoryo sa pagtuon sa humay sa tibuok kalibutan, nga mao ang International Rice Research Institute nga nahimutang sa Los Banos, Laguna. Apan ang teknolohiya sa maong laboratoryo wala gyud magsilbi dinhi sa ato. Sa ato pa, dili kita seryoso sa programa sa pagpalambo sa agrikultura. Kay ang atong kahibalo ug teknolohiya wala man nato i-tinuod pag-implementar. Ato mang gipasagdan ang atong mag-uuma. Tungod ba kay dunay mga bulsang nangaburot niining pag-smuggle sa humay?

Korupsyon. Pagka-daghang kwarta nga nawagtang sa atong goberno tungod sa korupsyon. Bilyones ang giingon gikawat sa mga Marcoses, hain na man kini? Pagka-anugon sa EDSA 1. Imbes nga mamahimo kining pag-tulun-an nga kita makakab-ot sa kadaugan pinaagi sa pagpakabana ug nasyonalismo, ang atong makita mao man hinoon kining atong mga lider ug namunoan nga mikopya sa kabuang ug pagpangawat sa ilang gisundan. Kon kining mga kwartaha gipahulam pa lang sa atong mga gagmay nga negosyante agig micro-financing nga giyahan sa goberno, hayan dili kita kinahanglan nga magbuhi kanila pinaagi sa pagpalit og makaon. Hinunoa, basin makatabang pa sila sa ekonomiya sa nasud.

Dili usab kita seryoso sa atong programa sa pagkontrolar sa gidaghanon sa atong katawhan. Nagpabiling iresponsable ang goberno ug mga pamilya sa pagplano sa pamilya. Nagkulang sa political will ang atong mga kadagkoan, bisan nga nagka-ubos ang kalidad sa atong kinabuhi tungod sa sobrang kadaghan nga walay klarong pagplano ug padulngan. Ang mga simbahan kulang sa pagtabang sa atong katawhan nga maka-amgo nga daw sama na sa iro ang kahimtang sa ubang kabataan kay lagi ang ubang ginikanan iresponsable kaayo. Samtang nag-adik adik ang inahan ug nagsugal ang inahan, ang anak biyaan lang. Adunay bata karong bag-o nga gibaligya lag unom ka libo ka pesos. Mas mahal pa ang iro nga imported.

Ang Pilipinas walay winter. Tibuok tuig pwede nga mananom. Ang atong kayutaan tambok, dili batoon, ug buhian kaayo sa mga tanom. Ang atong kadagatan daghang isda. Anaa kanato ang abilidad ug edukasyon. Apan sa likod niining tanan, daw wala kita mahibulong kon ngano nga ang atong katawhan gipang-gutom.

* * *

Alang sa imong mga panahom ug reaksyon, palihug email sa [email protected] o text sa 0915-5536986. Daghang salamat.