Doble kara

Ang kampo nilang Kongresista Antonio Yapha ug sa iyang runningmate nga si Congresswoman Clavel Martinez miinsister nga magpabilin sa administration coalition ug nga di kuno sila gustong moipon sa Genuine Opposition. Kini maoy hinungdan nga bisan kon sila sakop sa Lakas misakripisyo kunohay sila nga di nila madala ang ilang partido sa ilang pagduso sa ilang certificate of candidacy. Agi sab kuno og pagrespito sa hangyo ni Presidente Gloria Macapagal Arroyo ngadto nila nga di nalang mamugos nga mogamit sa Lakas nga partido aron kalikayan ang pagbangga sa mga sakop sa KAMPI. Apan unsa may diprensiya kon di Lakas ang ilang partido nga dad-on? Bisan wa sila modala sa Lakas, PDSP man pod ang ilang partido nga gidala diin sakop gihapon sa administration coalition. Migawas hinuon nga oportunista ang mga tandem nilang Yapha ug Martinez tungod kay samtang wa kunohay sila mobiya sa administration coalition apan ang ilang mga kauban nga kandidato tua man malinya sa oposisyon. Laktud nga pagkasulti, doble kara ang personalidad nilang Yapha ug Martinez sa pagkakaron. Ang ilang pikas tiil nagpabilin sa administrasyon samtang ang pikas atua sab sa oposisyon.

Ang tigpamaba sa Lakas nga si Bert Emphasis miangkon nga ang uban nilang kandidato gisagop sa Genuine Opposition. Bisan kon anaa sila sa coalition matud niya wa sila mobalibad sa tanyag sa oposisyon tungod kay sa politika importante ang tabang aron modaug.



Pero diduso ko sa pagsugot lang sa mga sakop sa Lakas dinhi sa Sugbu nga dili makagamit sa ilang partido. Segurado kong dili ingon kasayon nilang isakripisyo ang ilang katungod kon way sekritong pasalig ang administrasyon ngadto nila. Kon way pasalig ang administrasyon ngadto nila, ang laing posibilidad mao nga tua sila sa oposisyon nakigsabot. Aron paglikay nga gamiton sa administrasyon ang makinarya niini batok nila mao nga nagpabilin silang nagpakaaron ingnon nga naa gihapon sa coalition. Di man gud katuohan nga respito ra gyud sa presidente ang hinungdan nga ilang gisakripisyo ang ilang katungod nga modala sa Lakas. Pananglitan, si Clavel, kinsa may iyang giilad kon mangangkon siyang respito ra sa presidente ang ilang gihimo. Unsa may mas grabi pa nga pagpakita sa iyang way pagrespito ni Arroyo niadtong mipirma siya sa ikaduhang impeachment sa presidente ug sa direktang pag-akusar niini didto sa hawanan sa kongreso nga nanikas ni dinhi sa Sugbu sa miaging eleksiyon. Busa klarong pagpakaaron-ingnon ang iyang gihimo. Ang labing tinuod dugay rang tua siya sa oposisyon. Gani pagmatuod niini, silang Sonny Osmeña ang nag-uban karon. Unya hain man si Osmeña, diba tua sa GO?

* * *

fplanguido@yahoo.com