Gustong magpakasal

Gikan sa cellphone number 0921-6254203: "Good day, Sir. Ako si Ryan. Mangutana lang unta ko kon unsay akong buhaton aron makasal mi sa akong girlfriend. Taga Antique siya ug 20 years old samtang ako taga Cebu ug 26 years old na. Asa man mi puydeng magkuha og requirement para makasal sa civil. Nagplano ming magpakasal kay buntis na man siya." -- 0921-6254203 (Feb. 7, 2007 -- 19:06:29)

Dalaygon ang imong tumong, Ryan, kay nakahukom ka man sa pagpakasal sa imong girlfriend nga imong napamabdosan. Dili ka sama sa ubang mga lalaki nga mosibat kon mobusyad na ang babaye, igo lang mopahimulos sa higayon. Husto ang gusto mong himuon aron pagbangon sa dungog sa babaye nga imong gipukan.

Sayon ra man kanang imong katuyoan, Ryan. Kun ikaw ania sa dakbayan sa Sugbu, maoy duola ang city civil registrar kay makatabang sila nimo. Kun ikaw anaa magpuyo sa usa sa mga lungsod sa lalawigan sa Sugbu, maoy duola ang local civil registrar. Labing seguro, ang mayor maoy mokasal ninyo. Mas maayo usab nga pahibaw-on nimo ang mga ginikanan sa babaye sa inyong plano.

* * *

Sa laing bahin: "Good day, Sir. I'm a passenger that ply the Maribago-LapuLapu route and vice versa. Ang problema sa mga driver diri sa Opon mao kining mga estambay nga magdala og trapo. Di pa gani makatarong og lugar ang sakyanan sugaton na nila dayon trapohan ang windshield. Puwerteng hugawa ra ba sa ilang trapo. Unya kun di mosugot ang driver nga trapohan ang windshield sa sakyanan, manghingi na lang og P1.00. Kun di mohatag ang driver, suyakan ang iyang sakyanan." -- 0926-7038749 (Feb. 8, 2007--09:46:45)

Makahasol gyud tinuod ang gihimo niining maong mga estambay. Unsa man? Dili ba gyud makahimo pagbadlong ang mga polis o barangay tanod o kaha si bisan kinsang opisyal nianang maong mga estambay? Mas maayo gani tingali nga maghikay gayod og ordinansahon batok nianang maong mga estambay aron mas lig-on ang sukaranan sa pagbadlong nianang ilang tinonto. Kon nagtrabaho pa kana silag tinarong, dili unta sila makapuwerhisyo sa mga driver. Mga tapolan kanang maong mga estambay!

(Sumbong ug reklamo? Text sa 0910-8105522)