Dehado si Tomas

Tinuod tingale ang ingon nila nga alang sa mga politiko, walay permanente'ng managhigalaay. Kaniadto, maayo'g buot sa usa'g usa sila si Kongresista Eduardo Gullas ug Mayor Tomas Osmeña.

Dunay higayon gani nga sa dihang nagproblema sa paghipos sa basura ang dakbayan sa Talisay pipila ka tuig na ang nakalabay sa dihang si Gullas pa ang mayor niini, gitugtan ni Osmeña ang silingang dakbayan paggamit sa Inayawan landfill.

Gani, gilatigo ni Osmeña ang konseho sa dakbayan sa Sugbu sa dihang misuki kini sa iyang lakang pagtugot sa Talisay paglabay sa basura niini sa Inayawan. Apan karon nausab na ang panahon.

Nahisama sa igo sa kilat, kalit lamang nasiak ang maayong relasyon tali ni Gullas ug Osmeña. Kini sa dihang may nalilian si Gullas nga bahin sa Talisay nga naapil sa ambisyosong proyekto ni Osmeña nga mao ang South Road Properties.

Hilabihan sa kayugot ni Osmeña ngadto kang Gullas ug misangpot kini sa iyang pagpalayas sa mga tindera'g isda nga taga Talisay gikan sa kamerkadohan sa dakbayan sa Sugbu. Karon, aduna nay manok si Osmeña karong umaabot piniliay alang iatbang sa mayor ni Gullas sa siyudad Talisay.

Determinado gayud si Osmeña pagkuha sa Talisay gikan ni Gullas. Apan dili kaha maglabad ang ulo ni Osmeña kon unsaon pagdaug sa iyang manok nga si Konsehal Gabby Leyson batok kang Mayor Socrates Fernandez?

Sa laing bahin, maayo usab kaniadto ang politikanhong relasyon tali ni Osmeña ug Thadeo Ouano, ang mayor sa dakbayan sa Mandaue. Apan karon mora'g mortal na hinuon silang kaaway human sa nagkalainlaing isyu nga ilang gikalambigitan.

Unang nagtigi ang duha kabahin sa proyekto sa tubig sa Metropolitan Cebu Water District. Kini tungod kay wala makaayon ni Ouano sa pagbabag ni Osmeña sa project proposal sa Ayala consortium alang sa MCWD.

Human niadto, giimbitar ni Osmeña si magpapatigayon Norberto Quisumbing, ang kontra ni Ouano sa politika, nga sa dakbayan na lamang sa Sugbu ibubo ang ilang mga puhonan. Gani, gihimo pa ni Osmeña si Quisumbing nga adopted son sa dakbayan.

Apan samot nga mibukal ang tensiyon taliwala nilang duha pagbuto sa isyu sa overpriced decorative lamppost nga gigamit sa mga dakbayan sa Sugbu, Mandaue ug Lapu-Lapu atol sa Association of Southeast Asian Nations Summit sa niaging Enero.

Gani, wala usab makaipsot si Lapu-Lapu City Mayor Arturo Radaza sa pagpanghilabot ni Osmeña. Kini sa dihang mikomentaryo si Osmeña sa giingong mga reklamo sa mga magpapatigayon sa maong dakbayan batok sa giingong corruption sa lokal nga pangagamhanan didto.

Apan ang dakong kontra ni Osmeña karon mao ang kagamhanan sa lalawigan gumikan sa isyu sa naungot nga sabot-sabot sa binayloay sa yuta tali sa Kapitolyo ug siyudad.

Kahinumdoman nga ang paghinapakay og akusasyon sa matag habig maoy nakababag pagkab-ot og maayong resulta sa land swapping deal. Kini gisamotan pa sa moratorium sa konseho sa Sugbu sa dakong proyekto sa Kapitolyo sa Banilad gumikan kuno sa problema sa trapiko.

Lisud nga moasenso ang Metro Cebu kon walay political ug economic alliance ang mga lokal nga kagamhanan ilalum niini. Sa nahitabo karon, morag dehado ang dakbayan sa Sugbu tungod kay gilibotan kini sa gikasungi'ng mga lokal nga kagamhanan.

Maayo siguro nga magbuhat na lamang si Osmeña og airport sa SRP. Kini aron aduna siyay magamit sa iyang mga biyahe sa higayon nga ideklara siyang persona non-grata sa mga lokal nga kagamhanan nga naglibot sa dakbayan.

* * *

Ipadala inyong reaksiyon sa [email protected]