Taas kaayo ang sermon mahitungod sa Libreng Kaluwasan. Sa dayon nang nahuman sa sermon ni Padre, iyang gisugo ang dyakuno sa pagpangolekta. Unya wala lang damha nga dunay gikan sa mga manimbahay ang niprotesta: "Padre! Dili ba niingon ka nga ang Kaluwasan, libre sama kalibre sa tubig nga among ginainom kada adlaw?" Namalandong og kadyot ang pari ug sa way lipod-lipod, iyang gitubag ang tawo: "Husto ka Igsuon nga ang kaluwasan libre, sama sa tubig nga imong giinom. Apan hibaw-i baya nga kinahanglang mobayad gyud ta sa tubero nga moasikaso sa tubo."
Pamalandong
Kasagaran natong madungog ang mga pangutana: "Pilay bayad sa Misa?" Tabi, brad, dili kabayran ang Misa ug bisan unsang mga sakramento sa simbahan. Ang imong gihatag halad lamang aron sarang makatampo sa mga materyal nga panginahanglan sa usa ka simbahan. Apan wala kini magpasabot nga ang kaparian magpatuyang na lang og bungat og presyo una pa ihatag ang usa ka serbisyo. Kay sayud naman sila ba sa panultihon: "Nga basta kabus na gani ang nagkinahanglan: Libre gyud ni ug apilan pa gyud og gugma. Kay matud pa: "Gratis et Amore. Kay mas bililhon ang kaluwasan sa mga kalag kaysa sa pagbungat og presyo nga usahay taga-liog na!"