Trak sa basura

Usa sa mga suliran karon nga ingon sa kumon sa bisan asang dapit sa dakbayan mao ang bahin sa basura. Importante kaayo nga regular ang paghipos sa basura sa mga garbage collector aron dili magtipun-og ug dili magpangalimog sa kabaho ang usa ka dapit. Kun lisud man ang pagkolekta kada adlaw, angay gyud nga adunay regular nga adlaw nga igahin sa pagpangolekta og basura aron dili mogantuong.

Nunot niini, may text nga nag-ingon: "Good day. Naa lang unta koy ireklamo bahin aning mga trak sa basura. Usa na gyud ka semana nga wala nila kuhaa ang among basura diri. Moagi man tuod sila diri sa amoa pero modiretso ra sila kay magpatimbang sa ilang mga plastic ug puthaw sa among silingan nga junk shop. Naa mi diri sa may J. de Veyra St., Mabolo, Cebu City. Kun magpadayon ning ilang gihimo, asa na man lang namo ilabay ang among basura? Manimaho mi diri." -- 0922-3493057 (January 29, 2007 -- 15:01:02)

Akong panghinaoton nga inigkapatik niining imong reklamo nahipos na ang basura diha sa inyong dapit. Angay pangitaan og alternatibong paagi nga dili kaayo magtipun-og ang mga basura diha. Labing maayo gayod nga kada adlaw may mangolekta og basura aron dili manimaho ang palibot. Hinuon, angay usab natong sabton usahay ang dili kalikayan nga aberiya o kakulian. Pero kutob sa maarangan, angayan himuong regular ang pagpangolekta og basura aron limpiyo ang palibot.

* * *

Sa laing bahin: "Naa lang koy reklamo sa usa ka kawani sa city hall diri sa Lapu-Lapu. Nilukat kog cedula, nasayop ra gani kog fill-up, iya man nuon kong gisiyagitan nga danghag. Dili unta mag-iningon niana, ba. Nakasakit man god siya og tawo. First time pa god to nakog lukat." -- 0910-2372152 (Jan. 28, 2007 --21:25:00)

Bastos tong maong kawani sa city hall. Nahikalimot seguro siya nga buhis sa katawhan maoy gisuweldo niya. Mao kini ang nakaapan sa ubang trabahante sa mga buhatan sa kagamhanan kay walay respeto sa mga magbubuhis nga maoy nagbuhi kanila. Imbes nga siyagitan, angay unta giyahan kun dili magkadimao pag-fill-up sa cedula.

* * *

(Sumbong ug reklamo? Text sa 0910-8105522)