KBP plugs

Malampusong gilusad sa Kapisanan ng mga Brodkaster ng Pilipinas (KBP) Cebu Chapter ang iyang election plugs nga gipaabot nga maoy modominar sa mga sibya sa iyang 39 ka sakop nga mga sibyaanan sa AM, FM ug telebisyon. Ang kalihokan nga gipangulohan ni KBP Cebu Chairman Edward Abad nagtimaan sa sinugdanan sa makahuloganong kalihokan sa kinatibuk-ang industriya sa pagpanibya sa Sugbo nga gitumong pagtabang sa mga botante pagpangandam sa eleksiyon sa Mayo 14.

Si Abad nipasabot nga ang KBP mohimo sa iyang tampo uban ang paglaom nga ang hiniusang pagbarug ug pag-awhag sa mga magsisibya sa Sugbo alang sa ligdong nga piliay makatabang sa pagpatigbabaw sa tinuorayng kabubut-on sa katawhan pagpahimutang sa katungdanan sa matarung nga mga tagduma sa kagamhanan, nga maningkamot paghatag sa labing dakong kaayuhan alang sa labing daghan.

* * *

Matud ni Abad di tiaw-tiaw ang kampanya sa KBP. Minilyon ka pesos nga balor sa airtime ang maggasto pagpatuman sa kalihokan. Kon isibya sa mga sakop sa KBP og kausa lang matag adlaw ang unom ka bersyon sa election plugs sa mosunod nga 45 ka adlaw-ang gitas-on sa kampanya sa lokal nga mga kandidato-pinasikad sa labing ubos nga bayranan sa matag 30 segundos nga commercial, mobalor na ang kampanya og labing menos P5 milyones. Apan tungod sa saad sa mga sibyaanan, nga naglakip sa mga di sakop sa KBP, sa hingpit nga pagpaluyo sa kampanya, ang KBP Election plugs maoy mabatian sa mas daghang mga botante sa tibuok Kabisay-an ug Mindanao-labaw sa mga naabot sa political ads sa labing adunahan ug gastador nga senatoriable.

Wa hinuoy sakop sa KBP nga nagtuo nga ang election plugs makapahunong sa usa lang ka pamilok sa tikas ug makahimo nang putli sa piniliay. Apan segun pang Noy Emil Rizada Jr., usa sa naghatag og kinabuhi sa plugs, "Basin na lang."

* * *

Ang paglusad sa KBP Election plugs gipahigayon sa lapad nga board room sa Club Ultima, nga nahimutang sa ika-19 nga andana sa Fuente Towers. Ang nabantang pag-ayo nga kalapad sa Sugbo nga naglibot namo nakapahinumdom sa tanang nanambong sa kadako sa hagit sa kausaban nga giatubang sa katawhan sa eleksiyon karong Mayo ug sa kagamitoy ra sa kampanya nga among gisugdan.

Apan determinado ang kadagkoan sa KBP. Ang election plugs sinugdanan lang sa uban pang kalihokan paghatag og kahigayonan sa mga botante pag-ila sa mga piliunon ug sa mga kandidato pagpahibawo sa ilang mga nahimo ug sa ilang mga plano kon makalingkod sa gahom. Kumbinsido ko nga ang tawo, bisan unsa niya kagamhanan, kahakog ug kadaotan, may tanlag ug kasingkasing nga mahimong mahikap sa makanunayong pagmaymay. Ug nga ang kinabag-an sa mga botante, bisan unsa nilang kakabos, kaburong ug kahuyang, may katakos pag-umol sa mas sanag nga kaugmaon.

* * *

Email: [email protected]