Gungob giilog sa Lakas

Namiligrong hingpit nga malangkat gikan sa oposisyon kampo ni Gobernador Gwen Garcia ang suporta ni Mayor Avelino Gungob diha sa Consolacion. Kini human manglu-od si Gungob kang Kongresista Nerissa Soon Ruiz ug mitakli sa iyang suporta ngadto ni bokal Luigi Quisumbing.

Si Gungob miingon nga ang pagpanghilabot ni Ruiz sa mga kandidato nga iyang ikauban diha sa lungsod sa Consolacion maoy hinungdan nganong mihukom siya nga mobali sa iyang loyalty ngadto ni Quisumbing.

Nagkanayon si Gungob nga wa siyay utang kabubut-on ni Ruiz tungod kay wa sad kuno kini'y nahatag nga mehoras ngadto kaniya. Si Gungob kauban ni Ruiz sa partido, KAMPI, ug kaalyado ni Garcia.

Apan tungod sa pagbali niya ngadto ni Quisumbing namiligro karon ang iyang membership sa KAMPI sanglit si Ruiz maoy pangulo niini diha sa sixto distrito. Apan taliwa sa hulga nga siya mamahimong silotan sa partido, si Gungob mibarug sa iyang prinsipyo.

Andam kuno niyang isakripisyo ang iyang membership sa KAMPI kon siya silutan sa iyang pagsuporta ni Quisumbing. Gani mibahad pa nga bisan sa kampo ni Garcia andam siyang mobiya kon pugson siya niini nga makig-uli ug mosuporta ni Ruiz.

Ang rason ni Gungob nganong mas iyang palabihon nga motipon ni Quisumbing bisan di ni niyang kapartido kaysa iyang mga kauban, gawas nga but-an siya kon kinsay iyang runningmate, mas dako kuno siyag pagtuo nga makatabang si Quisumbing kay ni Ruiz sa iyang mga gidamgong proyekto sa iyang lungsod.

Damgo niya ang development diha sa Cansaga Bay, diin matud niya tukuron ang mga luho nga mga proyekto sama sa golf course, supermarkets, malls ug uban pa nga mga development.

Iya sab nga gidamgo ang 15 kilometros nga mountain highway nga mohatag og kasayon sa mga mag-uuma sa bukirang mga barangay paghatud sa ilang mga produkto sa lungsod.

Iya hinuong giklaro nga sa pagkakaron nagpabilin siyang kaalyado ni Garcia, apan iya sab nga gitataw nga mapugos siyag biya niini kon pugson siyang adto mosuporta ni Ruiz.

* * *

Way angay'ng hatagan og kredito sa pagkapakgang sa tinguha untang pagsabutahi sa Presidential Anti-Graft Commission sa imbistigasyon sa Ombudsman sa mga anomaliya sa pagpamalit og mga decorative lampposts ug street lighting facilities atol sa ASEAN summit kon di ang mabinantayong sakop sa media dinhi sa Sugbu.

Human mabantayi ang ilang tinguhang pag take over unta sa imbistigasyon, daling mikilisiw ang PAGC ug ang Malakanyang paghimakak niini. Di kuno nila gustong ilogon ang kaso gikan sa Ombudsman.

Apan ang kasaligan kaayo nakong tinubdan miingon nga duna gyuy pressure didto sa kaulohan nga ipatugyan sa Ombudsman ang tanang dokumento ngadto sa PAGC. Si Crisologo Saavedra pod mitug-an nako nga gitawgan siya sa PAGC nga i-withdraw ang iyang reklamo didto sa Ombudsman ug ibalhin didto sa ilang buhatan.

Kon di pa tuyo sa PAGC nga lawgawon ang imbistigasyon, unsa may tumong sa ilang imbistigasyon? Kon maghisgot tag kredibilidad di kaduha duhaan ang credibility sa Ombudsman nga usa ka constitutional body kon itandi sa PAGC nga tinukod sa Malakanyang.

Unsa may mahimo sa PAGC nga di mahimo sa Ombudsman? Kon buot hunahunaon mas gamhanan ang ombudsman kay nila tungod kay ang Ombudsman duna may gahom sa criminal aspect sa kaso samtang kutob ra sa administratiba nga PAGC diin duna pod niini ang Ombudsman.

Nganong kinahanglan paman gyud sila nga mohimo og ilang kaugalingon kon wa pa silay laing motibo? Di ba mas sayon ug mas makalikay og dugang gasto ang gobyerno kon huwaton nalang nga mahuman ang nasugdan na sa Ombudsman?

Ang duda sa publiko nga dunay gustong protehian ang Malakanyang hinungdan nga gusto nilang maoy mohimo sa imbistigasyon aron mas sayon ang pagtapion sa angayang taguan gikan sa mga mata sa publiko.

[email protected]