Afrena 7 nagpaluyo sa one-Cebu movement

Mao kini ang naabot nga desisyon sa mga sakop sa kahugpungan sa mga kanhi regional executives dinhi sa region 7 – ang pagpakita sa ilang pagsuportar sa gipasiugdahan nga tinguha ni Gobernador Gwen F. Garcia nga magpabiling usa ang lalawigan sa Sugbu, batok sa mga tinguha pagbuak-buak niini ngadto sa upat ka bahin.

Sa usa ka executive meeting, ang mga sakop sa Afrena 7, mipasar og resolusyon pagsupak sa Sugbuak, diin ang maong resolusyon, giaprobahan sa general assembly nga gihimo diha sa Department of Agriculture social hall.

Sa usa ka tinuyo nga tigom, ang mga sakop sa Afrena 7, mipresentar ngadto kang Gobernador Garcia sa anti-Sugbuak resolution, pinangulohan sa presidente, Boy Odilao.

Si Gobernador Gwen Garcia mipalanog sa iyang kahimuot nga ang mga kanhi regional heads nagpakita usab sa pagsupak pagsiak-siak sa lalawigan, diin matud niya, dili economically viable.

Sa gihimo nga pagtuon sa lalawigan, nakita nga pulos mga disadvantages ang maangkon sa mga Sugbuanon kon buk-on ang Sugbu. Gawas pa, dili mo-qualify ug dili makatuman sa mga requirements sa land area ug income. Gani, tapus mabuak ngadto sa laing tulo ka bahin, mogamay pag-ayo ang land area sa mahibilin, ang ikaupat nga bahin, bisag ilakip pa ang dakbayan sa Sugbu.

Dugang pa, ang maong tinguha, kinahanglan magagikan ug pagabut-an sa mga molupyo mismo, ug dili kay kagustoan lamang sa mga political leaders. Mao nga gikalipay sa gobernador ang gihimo sa Afrena 7 pagpadayag sa pagtutol sa mga tinguha nga buk-on ang lalawigan.

Sa maong resolusyon, ang Afrena 7 miingon nga bisan pa pagkalain-lain sa mga political leanings sa mga Sugbuanon, nagpabilin ang pagkamalinawon ug pagkahiusa sa mga Sugbuanon. Dili maayo nga tugawon ang maong peace and unity among the Cebuanos pinaagi sa pagsiak-siak niini, nagkanayon ang Afrena 7.

Kauban ni Odilao sa pakig-audience sa Gobernador, sila si Boy Oppus, Ben Diamos, Joe Gapas, Ted Segura, Sol Baclayon, Flor Villarin, Lindy Morrel, ug Maning Lazala nga mi-representar ni Dodo Abella. Ingonman, nauban si Benhur Salimbangon, kanhi board member sa lalawigan, gumikan sa iyang pag-alayon sa tinguha sa Afrena 7 pagsupak nga buk-on ang Sugbu.