Pusher luyo sa merkado

Kining mga druga naa gyud bisan asa. Adunay mga lugar nga ingon sa identified na kaayo nga may naglihok nga mga drug pusher. Basin walay kasayoran niini ang kapolisan maong wala masikop ang maong mga pusher. Ang mga molupyo sa lugar man gyud maoy mas nasuheto sa ilang dapit busa angay natong tuohan ang ilang mga sumbong ug angay kining susihon sa mga awtoridad.

Dugtong niini, nakadawat kog text nga nagkanayon: "Good day, Sir. Dunay pusher diri sa luyo sa Mandaue Public Market. Ang iyang ngalan mao si DI (inisyal). Dunay duha ka polis nga mag-arian niya, Sir. Pulos sila nadestino sa Mandaue. Nahibulong mi nga wala man gyud nila dakpa ang pusher nga ilado man kaayo ning tawhana nga pusher. Salamat." 0906-5557870 (Jan. 27, 2007-17:56:38)

* * *

Basin wala masayod ang kapolisan nga pusher kanang tawhana. O ba kaha naghulat pa ang kapolisan nga makahipos silag dugang ebidensiya nga mopalig-on sa sukaranan pagsikop nianang maong pusher. Dili man gud basta-basta nga sikopon lang sa dakong kasayon ang usa ka tawo kon walay lig-ong ebidensiya batok kaniya.

Hinuon, kon sa imong paniid morag suod kaayo ang maong pusher ug ang duha ka polis nga mag-anhaan niya, makapaduda ang ilang mga lihok. Akong klarohon nga wala ko mamasangil nga ang maong mga polis nakigkunsabo sa pusher. Pero makapangutana sab ko kon nganong makigkita man ang maong duha ka polis ngadto sa maong pusher?

Aw, basin managhigala sila. Pero kon managhigala sila, wala kaha makapaniid ang maong duha ka polis nga may illegal nga buhat ang maong tawo nga motubag sa inisyal sa ngalan nga DI? Dili ko gustong magduda pero nagtuo kong wala magtiaw ang atong texter sa impormasyon nga iyang gipadangat ngari kanato.

* * *

Sa dili pa ta mamasangil ngadto sa kapolisan sa dakbayan sa Mandaue kining maong sumbong sa usa ka texter. Dili man lisod tultolon kanang giingong pusher kay matud pa sa atong texter, naa ra man kana luyo sa Mandaue Public Market. Angay sab tinoon kun unsay deal ni DI ug nianang duha ka polis nga mag-anhaan kaniya. Ang hepe sa kapolisan sa Presinto 1 maoy usa sa angay mohimog pakisusi niini.

(Sumbong ug reklamo? Text sa 0910-8105522)