Pamalandong Matag Domingo
Marso 18, 2007: Ikaupat nga Domingo sa Kwaresma
Jos. 5: 9a. 10-12/2 Cor. 5:17-21/Lk.15:1-3,11-32
Usa sa mga mahinungdanong balansayon karong panahona sa kwaresma mao ang pagpangompisal sa kadaghanang mga tawo lakip na pud kaming mga pari. Nagkadaiya ang mga panlantaw sa mga tawo kalabot ning maong sakramento. Sa kinatibuk-an buot kita og kapasayloan sa atong mga kasal-anan. Ang ubang mga panlantaw nahipunting sa ilang pagsabot sa Ginoo. Alang kanila, ang Ginoo usa ka Dios nga masuk-anon ug mopasaylo lamang kun kita mobalik kaniya pinaagi sa sakramento sa pakighiuli ug sa pagpenitensiya.
Apan lahi ang atong Dios, usa siya ka Dios nga maloloy-on ug mahigugmaon. Andam mopasaylo ug puno sa kaayo. Ang kinaiya sa usa ka Amahan nga gihulagway sa atong ebanghelyo karong Domingoha, mao ang usa ka halawom nga matang sa pagpakita kun unsa ug kinsa gayud ang Dios alang kanatong mga makasalala.
Sa matag higayon nga ako mopakompisal, ako usab namalandong kun hain ug asa na ako dapita diha sa akong pagbansay-bansay sa pasaylo ug gugma sa Dios diha sa akong kinabuhi ingon nga pari. Gani, subo lang kaayo palandongon nga ning mga panahona, nagkakunhod ang kadaghanan diha sa pagpangompisal ug pagpakompisal. Gawas nga nawala na ang debosyon, daw sa nahimo na lang kining "requirement' na lang aron makompleto ang mga balansayon sa kwaresma. Ang nakapait kay ang kompisalan, gihimo na lang nga daw usa ka basurahan sa mga salang gibuhat nga gilabay sa kompisalan ug unya mopunit na pud og laing mga sala o dili ba kaha, managsamang mga sala.
Angay natong matngonan ang nga Dios padayong mohigugma ug mohigugma kanato hangtud sa hangtud. Ang gugma sa Dios haom lamang nga baslan usab og gugma. Kay pinaagi lamang niini, mabatonan nato ang tinud-anay nga diwa sa pasaylo...Nga sa ato pa, pasayloon ta usab ang mga nagpakasala kanato.