EDITORYAL — Habal-habal akseptado na

Tungod sa kakuwang sa transportasyon gikan sa siyudad ngadto sa mga bukirang barangay ug mga dapit nga walay lagpad nga karsada, adunay sugyot nga ilhon na ang habal-habal nga usa ka legitimate kun lehitimo nga sakyanan de pasahero.

Ang habal-habal nagkadaghan na karon timailhan nga kini akseptado na sa mga baryohanon. Gitawag nga ilegal sa uban apan nagpadayon nga paboritong transportasyon sa rural areas kay gipasagdan ra man ang operasyon niini.

OK ra man tingali kun ilhon na nato nga lehitimong sakyanan de pasahero ang habal-habal apan seguruon nga ang motorsiklo naa sa maayong kondisyon ug rehistrado.

Seguruon usab nga ang mga drayber sa habal-habal walay police record, dili adis-adis, dili palahubog, etc. ug pakupton sila og lisensiya isip awtorisadong drayber og habal-habal.