Gubot sa budget

Wala na gyuy klaro ang sistema sa partido niining atong nasud.

Matag eleksiyon, motumaw ang mga partido unya makadungog usab kita og mga balita nga mag-iyahay lang og panglupad ang mga politiko ambak paingon sa laing partido, asa siya makapabor.

Dili lang kay ang oposisyon ang nagkagubot karon, tungod kay lakip na ang administrasyon nagkatibulaag tungod sa walay klarong set-up sa ilang coalition.

Ang Kampi ug ang Lakas-CMD nag-ilog karon kinsa niining duha ka partido makauna og alsa bandira sa usa ka balwarte.

Usa ka die-hard sa Lakas-CMD miingon kanato nga ang deliberasyon sa administration coalition hilabihang kagubot ug magsininggitay na tungod sa magkasumpaki nga ideya.

Ang gikareklamohan sa Lakas-CMD, hain kadtong mga balwarte nga butangan og kandidato sa Lakas-CMD, butangan usab og kandidato sa Kampi.

Mao kini ang nahitabo sa Pangasinan. Ang Lakas-CMD mibutang sa anak ni Speaker Jose de Venecia pagka-kongresista, gibutangan usab og kandidato sa Kampi, si kanhi PNP chief Arturo Lomibao.

Daghang mga distrito, siyudad ug lungsod ang gubot kaayo tungod kay walay klaro kinsang desisyon alang sa coalition ang tumanon. Kini tungod lagi kay may chairman nga itudlo ang Lakas-CMD, unya dili usab paalkanse ang Kampi, motudlo usab sila og ila.

Pero usa ra gyuy hinungdan nganong daghang mag-ilog kinsay mahimong chairman sa usa ka partido o coalition -- ang budget!

Ingon niini ang sistema sa partido sa nasud, walay klaro tungod kay budget ra gyuy giapas!

* * *

BANTAY DAGAT. Sukad nawala sa kalibutan ang bantugang direktor sa Bantay Dagat nga si anhing Jojo dela Victoria, naghitak ang ilegal nga panagat sa kadagatan sa dakbayan sa Sugbu.

Ma-gabii, dayag kaayo ang mga dinamitero sa kadagatan, apan wala gyuy usa nga nadakpan ang Cebu City Bantay Dagat Commission, napasakaan og kaso ug napapriso.

Wala makaagwanta ang gagmay'ng mga mananagat hinungdan sa ilang pagreklamo batok sa pulpol nga direktor sa Bantay Dagat nga si Cesar Enriquez.

Ang aksiyon sa city hall igo ra gyud sa pag-ingong ipa-imbestigar si Enriquez tungod sa kapakyas niini pagsumpo sa ilegal nga panagat sa dakbayan sa Sugbu.

Mokapin na sa usa ka tuig isip direktor sa Bantay Dagat si Enriquez, apan wala pa gyud ko makadungog nga may mga mananagat nga nangadakpan sa akto nga naggamit og dinamita, gagmay'ng pukot ug hilo alang sa pagpanagat.

Wala pa gyud ko makadungog nga may gipatuman nga 'market denial' operation ang Bantay Dagat nga ubos na sa pagdumala ni Enriquez. Alang sa wala masayod, ang market denial nalatid kana sa Akta Republika 8550 kun Fishery Code, diin ang mga awtoridad sama sa Bantay Dagat, kapolisan, Coast Guard, Maritime Police, ug Bureau of Fisheries and Aquatic Resources (BFAR) mosudlay sa mga fish market aron dakpon kadtong mga isda nga mapamatud-an sa eksaminasyon sa BFAR nga nakuha pinaagi sa ilegal, sama sa dinamita.

Sakto si Mayor Tomas Osmeña nga dili angayang ikomparar si dela Victoria ug Enriquez. Apan maayong ingnon si Tomas nga naanad lang ang mga tawo sa dinad-an ni Jojo nga inabtik, dili sama sa dinad-an ni Enriquez karon sa Bantay Dagat nga hilabihang ka-seksi, walay agi!

Nahinumdum ko kaniadtong pila pa lang ka bulan sukad natudlo si Jojo isip direktor sa Bantay Dagat. Nangunay gyud siya og duaw nako sa dihang akong gisulat kadtong reklamo nga adunay mga fish warden sa Bantay Dagat nga nanawat og payola sa mga madakpan bugti sa dili pagkiha kanila.

Sukad niadto nasabtan nako ang isyu nga buot lang diay dauton si Jojo sa mga naigo sa market denial operation sa Bantay Dagat, ilabi na kadtong mga negosyante og isda gikan sa amihanang bahin sa lalawigan ug sa Zamboanga, hingpit ko'ng gisunod ang ilang mga operasyon.

Dili na nako mahinumduman pa ang kadaghan sa ilegal nga mananagat ang napa-konbikto ni Jojo; pila na ka toneladang isda nga pinabuthan nga gisakmit; ug ang kadako sa risgo sa iyang kinabuhi sa dihang gipanggukod ang sindikato sa blasting caps sa Biasong, Talisay nga gipanag-iya sa usa ka inilang negosyante.

Hapit matag semana sukad sa pag-asumer ni Jojo sa katungdanan, aduna gyuy dinamitero ug trawler nga mangadakpan.

Ang angayang ipangutana ni Enriquez kun nag-unsa ra siya sa iyang katungdanan isip direktor sa Bantay Dagat nga hangtod karon, wala man gyud siyay agi?