Dispatser sa Basak

Gikan sa cellphone number 0920-3587430: "Good day, Sir. Driver ko sa multicab nga magbiyahe sa rotang Naga-Basak. Samok kaayo ning dispatser sa may USJ-R Basak. Masuko kon di hatagan. Maayo sad unta nga iapil og dakop ang dispatser atbang sa simbahan sa Tabunok kay mao gyud nay pinakasalbahis nga dispatser. Manghapak kon di hatagan. Ako ra bang tan-aw kunsabo nila ang enforcer kay mangasaba man og apil. Kada hapon sila mag-operate." -- January 26, 2007--12:08:24)

Kon pahugtan lang ang pagpatuman sa anti-dispatching ordinance, seguradong mapitol ang badlongong mga dispatser sa dakbayan sa Sugbu, apil na kanang dispatser diha sa may USJ-R Basak. Kasalbahis god nianang maong dispatser? Nganong masuko man siya kon dili mohatag ang driver nga sa pagkatinuod lang, wala man gayud magkinahanglan ang driver sa iyang serbisyo. Awhagon ug hangyoon nato ang mga awtoridad sa pagbadlong ug pagsikop niining maong dispatser.

Kana hinuong dispatser sa atbang sa simbahan sa Tabunok nga labaw pang salbahis, kun walay anti-dispatching ordinance ang dakbayan sa Talisay, morag lisod ang pagpitol nianang mga tawhana. Labina kun tinuod ang katahap sa atong texter nga kunsabo sa maong dispatser ang enforcer. Pastilan!

* * * Mga Fixer

Nalipay ko dihang akong nabalitaan nga gipangsikop sa mga operatiba sa National Bureau of Investigation (NBI) ang mga fixer sa NSO. Mirisi! Mao kanay angay sa mga fixer nga walay laing gihimo kondili ang pagbunal og dinagkong mga bayranan sa atong kaigsuonan nga may transaksiyon diha sa buhatan sa NSO.

Angay unta nga isunod sa NBI ang pagsikop nianang mga fixer sa LTO, partikular na diha sa LTO-Mandaue. Grabe ang fixing activities diha. Dayag na kaayo. Sulod-gawas sa buhatan sa LTO ang mga fixer. Identified na sila pero wala gayoy nakabadlong nila. Kun dili gyud makahimo ang LTO sa pagbadlong nianang maong mga fixer, labing maayo tingali nga manginlabot na usab ang NBI niini. Sobra sa 40 ka tawo ang nag-fixer diha sa LTO-Mandaue. Aduna man ganiy labing menos lima ka fixer diha nga nag-apelyidog Gestopa, sumala sa akong enformer diha nga kasaligan gyud.

(Sumbong ug reklamo? Text sa 0910-8105522)