Dagway sa ugma

Boracay, Malay, Aklan - Ang mapa sa industriya sa pagpanibya nga gilatid sa liderato sa Kapisanan ng mga Brodkaster ng Pilipinas (KBP) mohangop inay molikay sa bag-ong mga teknolohiya isip kahimanan pagpalambo sa iyang labing mahinungdanong tahas pag-alagad sa nasud ug sa katawhan.

Si KBP Pres. Butch Canoy, sa iyang pagduma sa 10th National Chapter Leaders Conference nga gipahigayon dinhi, nipahibawo sa ilang determinasyon sa hingpit nga pagpatuman sa digital TV sa 2015 ug sa pagsibya sa digital radio sa labing dagkong mga dakbayan sa 2020.

Mahimo hinuong mas paspas pang mapatuman ang kausaban, matod niya, kon mas daling motidlom ang presyo sa teknolohiya, labi na kon mosud nang China sa patigayon sa mas tin-aw nga signal sa pagsibya.

* * *

Ang KBP motul-id sa panagway karon sa industriya nga nasobrahan ang komersiyalismo, paukyab ug pagsibya lang sa mga suliran sa way pagsubay sa mga solusyon.

Pagtuman ini, gipahibawo ni Canoy ang mosunod nga mga lakang:

Tulo ka oras matag semana nga cultural, educational ug advocacy programs;

Pagpalambo sa kultura sa kaligdong;

Pag-kampeyon sa kausaban sa edukasyon;

Pagdugang sa public service announcements matag adlaw;

Pagpananom og 500 ka kahoy matag KBP chapter matag tuig ug pangampanya pagpalambo sa kalikopan;

Pagpalapad sa langyab sa mga sibya ug pagpalambo sa kalidad sa mga tulomanon nga mahalin na sa ubang kanasuran;

Paghingusog sa anti-piracy campaign;

Pagpalapad sa accountability sa mga magsisibya ug ubang mga sakop sa media; ug

Pagtukod sa Broadcast Institute nga motudlo sa kabataan ug mopalambo sa responsableng pagpanibya.

* * *

Atol sa tigom nga gitambongan sa kapin sa 50 ka mga pangu sa nagkalaing rehiyon ug lalawigan, gipahibawo sa nagkalainlaing KBP chapters ang nag-unang mga pagsuway nga ilang nahiagoman:

Ang panag-unay sa mga sibyaanan sa pipila ka bahin sa Luzon, Kabisay-an ug Mindanao tungod sa higpit nga kumpetisyon; Mga sibyaanan sa radyo sa Mindanao nga nagsibya nga way tukmang mga dokumento gikan sa kagamhanan; ug Pagtidlom sa kita sa mga sibyaanan sa pipila ka lalawigan sa Luzon nga maabot sa signal sa mga sibyaanan sa Metro Manila.

* * *

Usa sa labing gipakpakan sa mga nanambong mao ang undanon nga accomplishment report ni KBP Cebu Chairman Edward Abad. Apil sa gitaho ni Abad: Ang higanteng relief campaign ug scholarship fund alang sa Guinsaugon, St. Bernard, Southern Leyte;

Radiothon alang sa mga biktima sa oil spill sa Guimaras; Pooled broadcast pagpangayog hinabang alang sa SOS Community ni Arsobispo Ricardo Kardinal Vidal; Dugang mga benepisyo alang sa mga magsisibya sa Sugbu, Bohol ug Negros Oriental; Pag-imbestigar ug pagdisiplina sa gipasanginlan nga iresponsableng mga sakop sa media; Pagtukod sa Broadcasters Foundation nga motabang sa masakiton nga nagkalisudlisod nga retiradong mga magsisibya; ug Paglusad sa KBP Cebu web log (http://kbpcebu.logspot.com).

* * *

Email: [email protected]