Panahon karon sa piniliay ug angay unta nga magtinabangay sila pagtabang sa liboan ka mga biktima sa labing dakong sunog nga miigo sa maong siyudad. Apan subong palandungon nga hinay kaayo ang ayuda nga ilang gibubo ngadto nga mga nasunogan.
Sa akong pagsulat niini, nagkamang lamang ang mga hinabang gikan sa lokal nga kagamhanan sa dakbayan sa Mandaue. Gani wala ko makadungog nga nagpadala na ba'g ayuda ang kagamhanan sa lalawigan ug ang representante sa ikaunom nga distrito.
Gani, nangreklamo kuno ang mga biktima sa sunog tungod kay lugaw lamang ang gidalit kanila sa lokal nga kagamhanan sa maong dakbayan. Sa atong nakita sa telebisyon, daghan sa mga biktima ang nagmulo gumikan sa ka kulang kuno sa hinabang nga ilang nadawat.
Hinuon personal nga mibisita si Presidente Gloria Macapagal-Arroyo sa mga nasunogan usa ka adlaw human sa maong insidente aron pagsaad og mga hinabang kanila. Apan kon kanus-a madawat ang tabang gikan sa Presidente, agta ray nasayud.
Basi sa mga taho, ang pribadong sektor ug mga concerned individual lamang ang kanunay nga miayuda sa mga nasunogan. Gani, ubay-ubay usab ang natigum sa mga higante'ng sibyaanang ABS-CBN ug GMA nga mga relief goods alang sa mga biktima sa sunog.
Maayo lamang siguro kining atong mga politiko diha sa maong lugar pagbungat og mga saad ngadto sa mga lumulupyo atol sa eleksiyon diin sangko sa langit ang ilang mga pangaliyupo ngadto sa katawhan pagbotar kanila. Apan kon moabot na gani ang katalagman sama sa nahitabo kaniadtong Miyerkules, dayon lamang sila'g likay sa ila usab nga tulobagon pagtabang sa mga biktima.
Atong kahinumdoman nga bongga kaayo ang dakbayan sa Mandaue pagpangandam sa nakalabay'ng Association of Southeast Asian Nations Summit nga mura og walay kinutoban ang paggasto sa salapi niini alang sa maong dakong katiguman.
Gusto tingale ipakita sa dakbayan sa Mandaue nga abunda kini sa salapi ug nga kaya niini ang pag-host sa mga higante'ng katiguman sama sa ASEAN Summit. Gani, grabe pa nga nakapanghambog ang mga opisyales niini nga ang siyudad mao unya ang mamahimong "convention capital" sa Asya.
Apan paglapdos niining maong katalagman, dili ikatingala nga daghan ang magduda sa kahinay sa ayuda gikan sa lokal nga mga kagamhanan sa dakbayan ug probinsiya, ug sa ubang politiko nga di na ikatingalang manghambog nga motabang sa katawhan, ilabina ning panahon sa piniliay.
Apan kanus-a pa man motabang ang mga hingtungdan? Unya na ba kon magsugod na ang kampanya alang sa eleksiyon aron makahakot sila og mga boto?
Karon maoy angay itabang sa mga biktima sa maong katalagman tungod kay ang ilang gipaabot niining panahona ang ilang matag adlaw nga panginahanglan. Ug mas maayo nga angay panid-an sa mga biktima kadtong mga politiko nga matinud-anong mitabang kanila aron sa ingon nga angayan usab silang ibutang sa puwesto.