Ikog ray gipakita

Si Mandaue City Mayor Teddy Ouano maoy labing unang nakapangompra ug nakataod sa kontrobersiyal nga decorative lamps dinhi sa Sugbu. Tulo ka tuig sa wa pang 12th Asean Summit, nga gipahigayon dinhi niadtong Enero ning tuiga, namalit si Ouano og kapin sa gatos ka suga alang sa tugkaran sa Mandaue City Hall, subay sa minilyon ka pesos nga balor niyang pagpa-guwapa sa Mandaue City Gardens. Bisan gikasab-an siya sa Commission on Audit (COA) nga pag-usik-usik ug pagwaldas-waldas ("immoderate, prodigal, lavish, luxurious, wasteful, grossly excessive and injudicious") ang iyang paggasto og P11.6 milyones alang sa mga suga, wa motagam si Ouano. Giaprobahan na sab niyang pagpamalit og mas mahalong mga suga ginamit ang kuwartang gipabaha sa summit.

Maong daghan ang nagduda nga mas dako ang papel nga gihuptan nilang Ouano ug kaubanan kay sa gibisto sa Department of Public Works and Highways (DPWH) nga pag-andam ug pag-aprobar niya sa program of works and estimates (POWE) nga nagtakda sa makalilisang nga presyo sa deco lamps nga tag P224,000 matag usa.

* * *

Sa tulo ka mayor nga gipananghiran sa DPWH, si Ouano ang labing suhito sa deco lamps. Ambot naatol ba lang sab nga samtang wa manginlabot silang Cebu City Mayor Tomas Osmeña ug LapuLapu City Mayor Arturo Radaza, si Ouano ray giganahan nga naghimo og POWE nga nagrekomendar sa pagpangompra sa mas mahalong mga suga.

Gawas sa paglapas sa COA Circular 85-55A, nga nagdili sa "irregular, unnecessary, excessive or extravagant expenditure or uses of funds and property," gibisto sab sa COA ang uban pang bulilyaso sa transaksiyon ni Ouano:

• Gibayran ni Ouano ang kontraktor, F.A. Faller Trading and Construction, bisan wa pa mataod ang 105 ka Ramson Park lampposts, nga tag P110,000 matag usa, mas taas kay sa pinaburot nga presyo sa deco lamps sa mga ruta sa summit sa mga dakbayan sa Sugbu ug LapuLapu nga P85,000 matag usa;

• Nasakpan sa mga inspektor sa COA nga ang napu ka wa mataod nga deco lamps gibutang ra sud sa bodega; ug

• Dihang gipatubag sa COA, si Ouano igo lang niingon nga ang supplier nay angayng mopasabot sa dakong presyo.

* * *

Nagkatuiris nang tubag nilang Ouano ug iyang mga turutot sa paghukom ni Acting Visayas Ombudsman Virginia Palanca-Santiago nga iapil ang mayor sa imbestigasyon sa deco lamps:

• Si Ouano daling nakakita og planggana ug nanghunaw og kalambigitan sa transaksiyon;

• Si Mandaue City Administrator Serafin Blanco niinsistir nga wa silang kahibawo kinsay nagtakda nga P224,000 ang matag suga; ug

• Si Mandaue City Councilor Carlo Fortuna niingon nga P50,000 ray gitakda sa POWE nga gipirmahan ni Ouano.

Laing tilimad-on nga wa na mahinultol ang kampo ni Ouano:

Nisaad si Fortuna paghatag sa media sa kopya sa POWE apan dihang gipaninglan, si Blanco nitunol og dokumento nga ikog ra, way ulo.

Email: [email protected]