Pacquiao nagsalig sa iyang kapopular

Gumikan sa daghang kuwarta ug gumikan sa iyang kabantog, di lang sa GenSan ug Pilipinas, kondili sa tibuok kalibutan gyud, ang akong idol ug idolo sa mokapin sa 85 milyones ka Pinoy, nga si Manny Pacquiao, nagtuo nga highly qualified na siya paghupot og bisan unsa nga katungdanan sa gobiyerno, kaylagi, kampeyon siya ug daghan kaayog kuwarta.

Iyang bugtong puhonan, kuwarta nga daghan kaayo ug popularity. Ug lagmit modaog tungod kay mao man kini ang atong gipangitang qualification sa usa ka public servant.

Dihay panahon sa atong kasaysayan, sa mga bata pa mi, nga ang eleksiyon giisip nga usa ka sagradong katungod nga tungod sa pagka-sagrado, maka-gaba kon binuangan.

Mangutana ta: Gigabaan na kaha ta ron, Dro? Tiaw moy ibaligya ang maong balaan nga katungod sa pagpili? Gihimo natong negosyo ang eleksiyon. Ug lakip si Pacquiao, tungod sa kadaghan kaayo sa iyang kuwarta, nagsalig nga sayon pamaliton ang taga GenSan.

Alang kang Pacquiao, tungod sa iyang kuwarta, ug tungod sa iyang pagkakampeyon, mas qualified siya sa Kongreso kay sa mga abogado, mga CPA, mga doctor, mga engineer, ug ubang professional nga way kuwarta ug dili world champion.

Miingon siya, nga gusto lang siyang motabang sa iyang isigkatawo. Pastilan. Di kinahanglan nga mag-Congressman siya aron makatabang. Lawmaking ang anaa sa Kongreso, dili social welfare. Ngano mag-sekretaryo lang siya sa DSWD? O di ba, iyang tukoron ang Pacquiao Foundation, Inc., usa ka charitable institution, ug iyang tabangan ang tanang pobre sa tibuok nasud.

Actually, maoy gusto sa Malacañang nga paphaon ang oposisyon sa Kongreso, aron makapatuyang sila sa gusto nilang buhaton. Gani, usa sa tumong sa charter change mao ang mag-abolish sa Senado tungod kay dili nila magawngan ang tanang Senador, lahi sa House of Representatives nga alang sa Palasyo, sayon da kaayong pa-dimanohon ug pa-disilyahon.

Mao nga nagkinahanglan silag mga popular nga mga personalidad, lakip na ang mga artista, i-atbang sa mga kandidato sa oposisyon. Si Lito Lapid, bisag way nahimo sa Senado, ipaatbang ni Mayor Binay sa Makati City.

Mao kini ang matang sa pamolitika dinhi sa atong nasud. Ang anaa sa gahom di na gustong mobuhi sa gahom. By all means, by hook or by crook, kinahanglan magpabilin sila sa gahom. Ambut unsay atong kaugmaon ini, Dro!